Երեւանի քաղաքապետարանի «Թիվ 17-րդ պոլիկլինիկայից» 2006-2009թ. ընթացքում խարդախությամբ 21.911.000 ՀՀ դրամ գումար հափշտակելու մեղադրանքով 5 տարվա ազատազրկման դատապարտված Ասպրամ Եղիազարյանը արդարացում է պահանջում: Վերաքննիչ դատարանում այսօր՝ հոկտեմբերի 18-ին, նրա շահերի պաշտպան Գարիկ Գալիկյանը ներկայացրեց վերաքննիչ բերած բողոքը: Բողոքի քննությանը չէր ներկայացել գործով մեղադրյալ Գ. Սարգսյանը, որը դատարանին չէր տեղեկացրել իր չներկայանալու պատճառի մասին: Գարիկ Գալիկյանը մեղադրողի այս պահվածքը որակեց դիտավորություն, որպեսզի իր պաշտպանյալը ավելի շատ մնա կալանքի տակ:
«Մեղադրողի չներկայանալու մեջ միտում եմ տեսնում, արդեն երկրորդ նիստը չի ներկայանում, երեւի մեղադրողի համար ձեռնտու տարբերակ է իմ պաշտպանյալին ինչքան հնարավոր է երկար կալանքի տակ թողնելը»,-ասաց նա:
Ամբաստնյալ Ասպրամ Եղիազարյանն էլ ավելացրեց, որ արդեն 7 ամիս է անազատության մեջ է եւ իր խնամքին ունի թոշակառու ծնողներ, մայրն էլ հաշմանդամ է:
Անդրադառնալով Առաջին ատյանի դատարանի դատավճռին, Գարիկ Գալիկյանը նշեց, որ դատարանն այս գործով սուբյեկտիվ մոտեցում է ցուցաբերել. «Դատավարությունը 2 տարի է տեւել, ամեն անգամ նիստերը նշանակվել են առավոտյան 9:30, ես եւ իմ պաշտպանյալը միշտ ներկայացել ենք, սակայն, շատ հաճախ այդ նիստերը չեն կայացել դատավորի՝ խորհրդակցական սենյակում գտնվելու, վատառողջ լինելու, արձակուրդում լինելու պատճառով: Իմ պաշտպանյալը 3 միլիոն գրավով կալանքից ազատ էր արձակվել, սակայն, դատավճռի օրը դատավոր Բեկթաշյանը գրավը անթույլատրելի համարեց եւ հենց նիստերի դահլիճից Ասպրամ Եղիազարյանին կալանքի տակ վերցրին: Ես գտնում եմ, որ դատարանի կողմից ապօրինի ակտ է կայացվել եւ այն ենթակա է բեկանման»,-ասաց Գարիկ Գալիկյանը:
Ասպրամ Եղիազարյանն ընդունել է իրեն առաջադրված մեղադրանքը, նրան մեղադրանք է առաջադրվել ՔՕ 179 հոդվածի 3-րդ մասի 1-ին կետով՝ Յուրացնելը կամ վատնելը:
Ասպրամ Եղիազարյանին մեղադրանք է առաջադրվել այն բանի համար, որ Երեւանի քաղաքապետարանի «Թիվ 17-րդ պոլիկլինիկայում» 2006-2009թ որպես գլխավոր հաշվապահ է աշխատել, խարդախությամբ հափշտակել է առանձնապես խոշոր չափերի ընդհանուր 21.911.000 ՀՀ դրամ գումար` «Թիվ 17-րդ պոլիկլինիկա» ԱՊՓԲ ընկերությունը պատճառելով առանձնապես խոշոր չափերի գույքային վնաս, բացի այդ, օժանդակել է նույն ընկերության տնօրեն Գագիկ Սահակյանին առանձնապես խոշոր չափերի` ընդհանուր 3.951.900 ՀՀ դրամ յուրացում կատարելուն, որի հետեւանքով ընկերությանը պատճառվել է առանձնապես խոշոր չափերի գույքային վնաս:
Գագիկ Սահակյանին մեղադրանք է առաջադրվել այն բանի համար, որ նա Երեւանի քաղաքապետարանի «Թիվ 17-րդ պոլիկլինիկա» ԱՊՓԲ ընկերության տնօրեն, 2006թ. ապրիլ-հոկտեմբեր ամիսների ընթացքում յուրացրել է առանձնապես խոշոր չափերի ընդհանուր 3.951.900 ՀՀ դրամ գումար` ընկերությանը պատճառելով առանձնապես խոշոր չափերի գույքային վնաս: Նա ստորագրությամբ ազատ է արձակվել:
