EuroBasket միջազգային մրցաշարը կարող է անցկացվել Երևանում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Երևանում առաջին անգամ կարող է անցկացվել EuroBasket անվանումը կրող միջազգային մրցաշարը:
«Արմենպրես»-ի հետ զրույցում այս մասին հայտնեց Հայաստանի բասկետբոլի Ա լիգայի նախագահ Արա Պողոսյանը: Վերջինիս խոսքով` հոկտեմբերի 1-10-ը նախատեսված մրցաշարին կարող են մասնակցել մի շարք թիմեր ԱՄՆ-ից, Ռուսաստանից և Բելառուսից: Մրցաշարի կազմակերպիչը EuroBasket բասկետբոլային միջազգային կազմակերպությունն է, որը մեծ հեղինակություն ունի համաշխարհային բասկետբոլում:
Հայաստանից այս մրցաշարին կմասնակցեն մի քանի թիմեր, կլինի նաև ազգային թիմ: «Հայաստանի բասկետբոլի Ա լիգային դիմեց EuroBasket-ը և առաջարկեց անցկացնել նմանատիպ մրցաշար: Ամեն ամառ և աշուն նույն EuroBasket-ն անցկացնում է միջազգային մրցաշարեր` տարբեր երկրներում, ինչպես օրինակ ԱՄՆ-ում, Ֆրանսիայում և Իսպանիայում: Սակայն նույնիսկ Ռուսաստանում նման մրցաշար չի անցկացվել, ետխորհրդային տարածքում առաջինը մենք ենք, որ ընդունում ենք այն: Պատրաստվում ենք մրցաշարի կազմակերպման բոլոր հարցերը համաձայնեցնել պարետատան հետ և հասկանալ, թե ինչ ձևաչափով կլինի այն, եթե հարկ լինի մրցաշարն անցկացնել առանց երկրպագուների, ապա այդպես էլ կվարվենք»,-ասաց Պողոսյանը:
Ի սկզբանե ֆեդերացիան նախապատրաստվել էր, որ հավաքական թիմը պետք է մասնակցի Եվրոպայի փոքր երկրների առաջնությանը, սակայն համավարակի պատճառով մրցաշարը չեղարկվեց, բայց հավաքականը պատրաստ էր մրցաշարին: Հիմա այդ նույն թիմը կարող է ուժերը փորձել EuroBasket-ի մրցաշարում: Մրցաշարը խոստանում է լինել բացառիկ իր մասնակից բասկետբոլիստների մակարդակով:
Մրցաշարը հնարավոր է հեռարձակվի առցանց:
Պատրաստեց Վարվառա Հայրապետյանը
Բաժանորդագրվեք մեր ալիքին Telegram-ում