Թուրքիայի նախագահ Ռեջեփ Թայիփ Էրդողանը Կրեմլում բանակցություններ է վարել Ռուսաստանի նախագահ Վլադիմիր Պուտինի հետ:
Մոսկվայում երկու ղեկավարների միջև տեղի ունեցած բանակցությունների սկզբում Պուտինը ցավակցություն է հայտնել Էրդողանին`Սև ծովում վթարի հետևանքով Թուրքիայի քաղաքացիների մահվան կապակցությամբ: «Ցանկանում եմ ցավակցություն հայտնել Թուրքիայի քաղաքացիների մահվան կապակցությամբ: Միջադեպը տեղի է ունեցել տարածքային ծովից դուրս՝ չեզոք ջրերում»,- մեջբերում է TASS-ը:
Պուտինը նաև ասել է, որ ռուս-թուրքական հարաբերությունների բարելավումը համարում է Էրդողանի անձնական ձեռքբերումը:
Նա նշել է, որ կանոնավոր հանդիպումների պրակտիկան, որը ողջունվում է երկու նախագահների կողմից, դրական արդյունքներ է արձանագրում, մասնավորապես, 2018 թվականի տասը ամիսների ընթացքում Թուրքիայի և Ռուսաստանի միջև ապրանքաշրջանառությունը աճել է ավելի քան ողջ 2017 թվականին։
«Անցյալ տարի Թուրքիայում ռուս զբոսաշրջիկների թիվը ավելացել է 30 տոկոսով և հասել ռեկորդային քանակի՝ 6 միլիոն մարդ: Սա ցույց է տալիս, թե ինչպես են մեր երկրների քաղաքացիները ընկալում ռուս-թուրքական հարաբերությունների բնույթն ու որակը: Պարոն նախագահ, սիրելի բարեկամ, սա գերազանցապես ձեր անձնական արժանիքն է, ձեր անձնական ձեռքբերումը, քանի որ դուք շատ ժամանակ եք նվիրաբերում դրան»,- ասել է Պուտինը:
Իր հերթին, Էրդողանը նշել է, որ Ռուսաստանի և Թուրքիայի միջև հարաբերությունների զարգացումը դրական ազդեցություն ունի Մերձավոր Արևելքի տարածաշրջանային անվտանգության վրա:
«Շատ ոլորտներում, այդ թվում` ռազմական, մշակութային, առևտրային, մեր երկրների միջ զարգացում է գրանցվում: Անշուշտ, այս զարգացումը չափազանց դրական է տարածաշրջանային անվտանգության համար: Աստանայի գործընթացի շրջանակներում մենք եռակողմ գագաթաժողովներ ենք անցկացրել ինչպես Մոսկվայում, այնպես էլ Անկարայում և Թեհրանում, ինչը նաև նպաստում է անվտանգության ապահովմանը»,- նշել է Թուրքիայի նախագահը: