Եվրոպական ժողովրդական կուսակցության նախագահ Ժոզեֆ Դոլը թվիթերյան գրառումով աջակցել է Սահմանադրական դատարանի նախագահ Հրայր Թովմասյանին՝ իշխանությանը կոչ անելով հարգել Սահմանադրությունն ու օրենքը և իշխանության փոխզսպման սկզբունքը:
Քաղաքագետ Ռուբեն Մեհրաբյանի կարծիքով՝ նման հայտարարությունը Հանրապետական կուսակցության նպատակադրված ջանքերի արդյունք է: «Սա միակողմանի հայտարարություն է։ Չմոռանանք, որ Հանրապետական կուսակցությունը հեղափոխության հենց առաջին օրերից տարբեր արևմտյան կառույցներում փորձում է ապացուցել, որ Հայաստանում չկա ժողովրդավարություն, և այս իշխանությունը ռուսամետ է։ Իսկ ռուսական ուղղության վրա էլ փորձում է ապացուցել, որ ինչ արել է, Սորոսն է արել։ Ընդ որում՝ այդ ամենն անում է միաժամանակ։ Սա այդ ընդհանուր արշավի մասերից մեկն է»,- «Առաջին լրատվական»-ի հետ զրույցում ասաց նա։
Մեհրաբյանը հարցադրում արեց. «Իսկ ո՞վ ասաց, որ Հայաստանում իշխանությունները չպետք է տարանջատված լինեն, այո՛, պետք է լինեն։ Բայց դա ի՞նչ կապ ունի Հրայր Թովմասյանի հետ, և ընդհանրապես՝ Հրայր Թովմասյանն ի՞նչ կապ ունի Սահմանադրական դատարանի ու սահմանադրական արդարադատության հետ։
Վերջին դիրքապահ Հրայր Թովմասյանն այդ ամենի հետ ի՞նչ կապ ունի։ Այսինքն՝ ես կարծում եմ, որ նրանք եվրոպացի մեր գործընկերների մոտ ստեղծել են թյուրիմացություն՝ նաև օգտագործելով այն փաստը, որ ներկայումս Հայաստանում իշխող կուսակցությունը՝ «Քաղաքացիական պայմանագիրը» կամ «Իմ քայլը» դաշինքը, չի անդամակցում այդ համաեվրոպական կառույցին՝ հանձին ԵԺԿ-ի, օգտագործելով այդ ընդհանուր դասավորությունը՝ նրանք փորձում են Հայաստանի վրա «մարդ բերել»»։
Ինչ վերաբերում է Դոլի մտահոգություններին, քաղաքագետը նշեց. «Բոլորն էլ մտահոգվելու իրավունք ունեն, բայց այստեղ մտահոգվելու որևէ հիմք չկա։ Կարծում եմ՝ ՀՀ իշխանությունները ԵԺԿ-ին, այդ կուսակցությանն անդամակցող հիմնական կուսակցությունների ղեկավարներին պետք է բացատրեն, որ Հայաստանում ժողովրդավարությունը պայմանավորված է նրանով, որ Հայաստանում Սահմանադրությունը, սահմանադրական արդարադատությունը պետք է մաքրվի աղվանհովսեփյանական, գագիկհարությունյանական մետաստազներից, և Հայաստանը այդ շլագբաումները իր դիմացից հանելով՝ պետք է շարունակի իր անկասելի ընթացքը ժողովրդավարության ճանապարհով»։
Այստեղ, ըստ Մեհրաբյանի, անելիքներ ունեն նաև Հայաստանի դիվանագիտական ներկայացուցչությունները՝ Բրյուսելում և եվրոպական տարբեր երկրներում. «Եթե այդ բացատրական աշխատանքը չեն կատարում, բա էլ ինչո՞վ են զբաղված։ Նախկին իշխանությունների մնացուկների պրոպագանդան կամ այս կամ այն պաշտոնյայի ականջին նստելը, պարզվում է, շատ ավելի զորեղ են, քան Հայաստանի Հանրապետության փաստարկները, որոնք պարզվում է՝ տեղ չեն հասնում»։
Քաղաքագետի դիտարկմամբ՝ ժամանակն է, որ մեր եվրոպացի գործընկերները թարմացնեն ԵԺԿ-ում անդամակցության ինստիտուտը: «Հարցերին պետք է մի քիչ ավելի խորը նայել։ Ըստ այդմ՝ ՀՀԿ-ն գաղափարական ընդհանրություններ ունի ոչ թե ԵԺԿ-ի, այլ «Ենի Ազերբայջան» կուսակցության հետ, Հյուսիսային Կորեայի իշխող կուսակցության, «Եդինայա Ռոսիա»-ի, Էրդողանի ղեկավարած ուժի հետ, բայց ոչ՝ ԵԺԿ-ի։ Խորհուրդ կտամ՝ մի քիչ ավելի ուշադիր հետևեն լրահոսին, տեսնեն, թե հանրապետականներն ինչեր են ասում տարբեր «սպուտնիկներ» վազելով։ Արդյունքում նման թյուրիմացություններ չեն առաջանա, և նման մտահոգություններ էլ մեր եվրոպացի գործընկերները չեն ունենա»,- եզրափակեց նա։