Քաղաքապետարանը դեռ չի արձագանքել Արամ Մանուկյանի արձանի տեղադրման վերաբերյալ մշակույթի նախարարության դիմումին
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: ՀՀ մշակույթի նախարարությունը դիմել է Երևանի քաղաքապետարանին, որպեսզի բացատրություն ստանա Երևանի մետրոպոլիտենի «Հանրապետության հրապարակ» կայարանի տարածքում Հայաստանի Առաջին Հանրապետության հիմնադիր Արամ Մանուկյանի արձանի կանգնեցման վերաբերյալ:
«Մենք այդ հարցով գրավոր դիմում ենք ուղարկել Երևանի քաղաքապետարան, բայց դեռ արձագանք չենք ստացել»,-«Արմենպրես»-ի թղթակցին ասաց ՀՀ մշակույթի նախարարի մամուլի քարտուղար Անի Սմբատյանը:
Արձանի բացման արարողությունը տեղի կունենա հուլիսի 17-ին: Ինչպես նշեց Անի Սմբատյանը, ՀՀ մշակույթի նախարար Լիլիթ Մակունցը չի մասնակցի միջոցառմանը:
ՀՀ մշակույթի նախարարությունը հայտարարություն էր տարածել, որտեղ անընդունելի էր համարել արձանի տեղադրումը` առանց իրենց հետ քննարկման:
«Հայաստանի Հանրապետության մշակույթի նախարարությունը համարում է, որ Երևանի մետրոպոլիտենի «Հանրապետության հրապարակ» կայարանը Երևանի կերպարը յուրահատուկ դարձնող ամենասիրված կառույցներից մեկն է, և կիսում է հասարակության ու մասնագետների մտահոգությունը՝ կայարանի պատմագեղարվեստական կերպարը փոխելու հարցում: Միաժամանակ, կարևոր համարելով Արամ Մանուկյանի դերն ու գործունեությունը հայոց պատմության մեջ և նրա արձանի կառուցման խնդիրը Երևան քաղաքում՝ այնուհանդերձ անընդունելի ենք համարում առանց մշակույթի նախարարության հետ քննարկման և համաձայնեցման արձանի տեղադրման թույլատրումը»,- ասված էր նախարարության տարածած հաղորդագրության մեջ:
Լուսանկարը՝ Tert.am-ի
Բաժանորդագրվեք մեր ալիքին Telegram-ում