Վաղը կառավարության գործունեության հնգամյա ծրագիրը կներկայացվի Ազգային ժողով: Կառավարության հնգամյա ծրագրի հեղափոխականության մասին տեսակետները բավականին տարբեր են, երբեմն՝ հակադիր: Միևնույն ժամանակ բոլորն են հասկանում, որ ծրագիրն ինքնին տնտեսական հեղափոխություն չի ապահովելու և ամեն ինչ կախված է նրանից, թե ինչքանով է այն թղթից վերածվելու իրական գործի: Սա Հայաստանի համար հավերժական հարց է, որը հնչել է նախորդ բոլոր կառավարությունների շրջանում: Սակայն թավշյա հեղափոխությունից հետո շատերն են կարծում, որ այդ հարցը պետք է դուրս գա օրակարգից, որովհետև Հայաստանում այլևս չպետք է լինի ծրագրերը թղթից գործի վերածելու քաղաքական հարցադրում: Այստեղ է, թերևս, իրավիճակի, իրականության հեղափոխականության գաղտնիքը:
Թեմայի շուրջ «Առաջին լրատվական»- ի հետ քննարկմանը մասնակցեցին հրապարակախոս, բանասեր Նարինե Դիլբարյանը, քաղաքագետ Սուրեն Պետրոսյանը և վերլուծաբան Աղասի Մարգարյանը:
Նարինե Դիլբարյանի դիտարկմամբ՝ վճռորոշ է այն, թե որքանով Կառավարության ծրագիրը կհամապատասխանի իրական գործեր կատարելու քայլերին և թե որքանով այդ իրական քայլերը կհամապատասխանեն հեղափոխության հռչակած քայլերին: «Ծրագիրը մարդկանց փոքր-ինչ խրտնեցրեց, որովհետև շատ ընդհանրական է, առաջնահերթությունները սահմանվածված են, բայց միայն բարի մտադրություններով, որոշակի թվեր չկան»,- նշեց Ն. Դիլբարյանը՝ հույս հայտնելով, որ ԱԺ-ում քննարկումների ընթացքում որոշակիությունները կամրակայվեն:
Ս. Պետրոսյանը կարևորեց ծրագրում Արցախի հիմնախնդրի վերաբերյալ այն դրույթը, որտեղ շեշտվել է, որ հիմնախնդրի լուծումը պետք է իրականացվի ԵԱՀԿ Մինսկի խմբի ձևաչափի շրջանակներում: Քաղաքագետը նաև նկատեց. «Թղթին հանձնված լավ ծրագիր է, ըստ էության, շուտով կհասկանանք՝ իրականության հետ ինչքանով կապ ունի: Որևէ մեկը չի կարող ասել, թե նախորդ կառավարության ծրագրերը գրված են եղել շատ վատ: Մենք ծրագիր գրելու խնդիր չունենք, ունենք ծրագրերն իրականացնելու խնդիր»:
Արձագանքելով հարցին, թե ինչու կառավարության ծրագրի շուրջ աղմուկ բարձրացավ, Ա. Մարգարյանը կարծիք հայտնեց, որ բուռն քննադատություն չեղավ, շատ մակերեսային էր կառավարության ծրագրի քննադատությունը. «Գուցեև չկար քննադատության խորքային պատճառ: Քննադատությունները զուտ քաղաքական նպատակներ էին հետապնդում»: Վերլուծաբանը նաև նշեց, որ ծրագրի վերաբերյալ մասնագիտական դրական գնահատականներ են հնչել, ծրագրում լուրջ բացթողումներ չկան:
Մանրամասն՝ տեսանյութում: