Ստամբուլի Շիշլի թաղամասում «Ակոս» պարբերականի նախկին խմբագրության առաջ այսօր՝ հունվարի 19–ին, հազարավոր քաղաքացիներ հավաքվել են հարգելու 11 տարի առաջ այս օրը սպանված Հրանտ Դինքի հիշատակը։

Ինչպես տեղեկանում ենք թուրքական Bianet կայքից, Հրանտ Դինքի հիշատակը հարգելու համար հազարավոր քաղաքացիների մեջ են եղել  Թուրքիայի խորհրդարանի հայ, քուրդ եւ թուրք պատգամավորներ, որոնց թվում Կարո Փայլանը, Սելինա Դողանը, Բարըշ Յարքադաշը, Ալի Շեքերը, Սեզգին Թանրըքուլուն, բազմաթիվ հայտնի արվեստագետներ ու մտավորականներ։

Դինքի հիշատակը հարգելու համար հավաքվածները կրկին ձեռքներին պահել էին «Բոլորս Հրանտ ենք, բոլորս հայ ենք» գրությունը հայերենով, թուրքերենով ու քրդերենով։

Սգո միջոցառման ժամանակ ելույթ է ունեցել Դինքի կինը՝ Ռաքել Դինքը, որից հետո բարձրախոսներով հնչել է Հրանտ Դինքի ելույթներից մեկը։

Ամբողջ միջոցառման ժամանակ ոստիկանները խիստ հսկողություն են իրականացրել Շիշլի թաղամասում։