Տեղի ունեցավ Հուսիկ Արայի սիրային պոեզիան ամփոփող ժողովածուի շնորհանդեսը
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Մեր օրերի լավագույն սիրերգակներից մեկի՝ Հուսիկ Արայի սիրային 65 բանաստեղծությունները և «Բուրմունքի հիշողությունը» պոեմը մեկտեղվել են հեղինակի «Եվ սերը ասաց» ժողովածուում: «Արմենպրես»-ի հաղորդմամբ` գրքի շնորհանդեսը տեղի ունեցավ հոկտեմբերի 25-ին՝ Խնկո Ապոր անվան ազգային մանկական գրադարանում:
«Այս գրքում զետեղված է իմ ամբողջ սիրային պոեզիան: Կան անտիպ բանաստեղծություններ, որոնք գրվել են վերջին երկու կամ երեք տարվա ընթացքում, մնացածը տարբեր գրքերում հրատարակված սիրային շարքեր են, որոնք հավաքել եմ մեկ գրքում»,- մեզ հետ զրույցում նշեց Հուսիկ Արան:
Նա խոստովանեց, որ իր համար գիրքը բացառիկ է: «Իմ սիրո մատյանն է, իմ ամբողջ ներաշխարհն է այստեղ ամփոփված, սերը, հիասթափությունը, ամեն բան: Այս գիրքն առանձնահատուկ եմ սիրում: Գրքում ներառված բանաստեղծությունները հաճախ եմ իմ ֆեյսբուքի էջում տեղադրում, և օգտատերերը դրանք տարածում են: Ամեն ընթերցող իր ապրումներն է գտնում իմ ստեղծագործություններում. հենց դա է իմ գործերի հաջողությունը»,- եզրափակեց գրողը:
Գրականագետ, «Եվ սերը ասաց» ժողովածուի խմբագիր Արքմենիկ Նիկողոսյանը պատմեց, որ իր առաջին գրախոսությունը, որով ներխուժել է գրաքննադատության ասպարեզ, եղել է միշտ մտահոգ, աշխարհի հանդեպ քննադատաբար և դառը տրամադրված Հուսիկ Արայի մասին:
«Հուսիկ Արայի մոտ շատ լավ է ստացվում սիրերգությունը: Չեմ կարծում, որ դա պայմանավորված է նրանով, որ Հուսիկին շատ են մերժել կյանքում: Այն մարդիկ, ովքեր կարդացել են գիրքը և դեռ կկարդան, կտեսնեն, որ սա ավելի շատ վայելքի պոեզիա է, քան սիրո տառապանքի, որովհետև Հուսիկն անգամ մերժման պահերին կարողանում է բանաստեղծականացնել իր զայրույթը, այսինքն, կարևորը` սեր լինի: Նա ասում է, որ ինքը կերջանկանա, ուզում ես մերժիր, հարվածիր, տանից դուրս հանիր»,- ընդգծեց Նիկողոսյանը:
Հուսիկ Արան ծնվել է 1967 թվականի հունիսի 24-ին Արարատի մարզի Մրգավետ գյուզում։ Ավարտել է Երևանի թիվ 10 միջնակարգ դպրոցը։ 1991-1996 թվականներին սովորել է Երևանի պետական համալսարանի բանասիրական ֆակուլտետի Ժուռնալիստիկայի բաժնում։ Առաջին բանաստեղծությունը տպագրել է 1985 թվականին «Ավանգարդ» թերթում։ 2001 թվականից Հայաստանի գրողների միության անդամ է: Նրա հրատարակված գրքերն են` «Մարդու որդիները», «Լուսանցքի մարդիկ», «Սևագրություններ», «Անիծվածները» և այլն:
«Եվ սերը ասաց» բանաստեղծությունների ժողովածուն արժանացել է Գրքի երևանյան փառատոնի 2-րդ մրցանակին «Պոեզիա» անվանակարգում:
Բաժանորդագրվեք մեր ալիքին Telegram-ում