Նոր տարուց առաջ բոլորի մոտ նույն հարցն է ծագում՝ ի՞նչ անել շատակերությունից խուսափելու համար: Ահա հինգ խորհուրդ, որոնց հետեւելու դեպքում դուք վնաս չեք հասցնի ձեր առողջությանը եւ չեք ավելացնի ձեր քաշը:
1. Ջուր խմեք
Իհարկե, տոնական սեղաններին դրված կլինեն այլ հետաքրքիր ըմպելիքներ, բայց հավատացեք՝ ջուր խմելը շատակերությունից փրկվելու ամենալավ եւ ամենահին եղանակն է: Եւ այսպես. Ինչո՞ւ է անհրաժեշտ ջուրը: Ջուրն առաջին հերթին այն տարրն է, որն անհրաժեշտ է մարդու նորմալ կենսագործունեության համար: Շատ հաճախ ծարավի զգացողությունը շփոթում ենք սովի հետ եւ շատ ենք ուտում: Սեղան նստելուց առաջ մի մեծ բաժակ ջուր խմեք եւ կուտեք այնքան, ինչքան ձեզ պետք է:
2. Շատ մի պատրաստեք
Որպես կանոն տնային տնտեսուհիները տոնից առաջ աշխատում են շատ պատրաստել, օգտագործում են նոր բաղադրատոմսեր, կիրառում են հարեւանուհիների եւ ընկերուհիների փորձը: Բնականաբար, չափից ավելի խցկված սեղանի հետեւանքներից մեկը լինում է բոլորովին ձեռք չտված ուտելիքները, որոնք հետո դուք կամա, թե ակամա սկսում եք ուտել հյուրերի գնալուց հետո: Ընդ որում, շատերը ուտելիս գիտակցում են, որ չի կարելի շատ խցկել բերանը, բայց այն միտքը, որ ափսոս է, հո չենք թողնելու փչանա, ստիպում է սկսել որկրամոլությունը:
3. Պատրաստեք «ճիշտ» ուտեստներ
Այո, ամանորյա գիշերն հենց այն պահերից է, երբ քեզ կարող ես թույլ տալ գրեթե ամեն ինչ եւ նույնիսկ սովորականից շատ ուտել: Այդ ժամանակ նախապատվությունը տվեք «ճիշտ» ուտեստներին: Օրինակ, խուսափեք մայոնեզով աղցաններից, գոճու վրա մայոնեզ մի քսեք եւ բավարարվեք մածնաթթվասերային մթերքներով: Տապական փոխարինեք ջեռոցում պատրաստված ուտեստներով, իսկ արեւածաղկի ձեթի փոխարեն օգտագործեք ավելի թանկ ձիթապտղի ձեթ:
4. Սեղանը՝ գլխավորը չէ
Իհարկե, տոնական սեղանը Նոր տարվա խորհդանիշներից մեկն է, բայց ոչ միակ: Հիշեք, որ տոնի հիմնական բաղադրիչը նվերներն են, ուրախ մթնոլորտը, շփումը, կատակները: Եթե կարող եք, ապա բավարարվեք ֆուրշետով կամ շվեդական սեղանով:
5.Կերեք փոքրիկ բաժիններով
Ձեր առջեւ նպատակ մի դրեք ուտել ամեն ինչ եւ շատ, եւ որ ամենակարեւորն է, ուտել սկսելուց առաջ չասեք՝ մի տարի է ոչինչ չեմ կերել հիմար արտահայտությունը: Այնպիսի տպովորություն չստեղծեք, որ որոշել եք թունավորվել կամ վնասել ձեր ստամոքսն ու աղիները: Կերեք փոքրիկ բաժիններով, չէ որ գիշերն առջեւում է: Այդպես սնունդը հեշտ է մարսվում եւ ձեր առողջության հերն էլ չեք անիծում:
