Սահմանադրական դատարանի՝ Ռոբերտ Քոչարյանի փաստաբանների բողոքի հիման վրա կայացրած որոշումը քաղաքական և փորձագիտական դաշտում լայն քննարկման առարկա դարձավ։
Արտախորհրդարանական ուժերից Հայ ազգային կոնգրեսն է անդրադարձել ՍԴ որոշմանն ու առհասարակ այդ դատարանի գործունեության լեգիտիմությանը։ Տարածված հայտարարության մեջ մասնավորապես նշվում է. «Սահմանադրությամբ կարևորագույն լիազորություններով և դերակատարմամբ օժտված ատյանի ոչ օրինակարգությունը սպառնում է վերածվելու քաղաքական և ընդհանրապես պետական ամբողջ համակարգի կայունությունը վտանգող մշտական գործոնի: Փաստացի գոյություն ունեցող վիճակի երկարաժամկետ պահպանումը, Սահմանադրական դատարանի լիազորությունների կատարմամբ առաջացող իրադրություններում, կարող է հանգեցնել իրավական քաոսի և պետական ինստիտուտների քայքայմանը»։
Արտախորհրդարանական ուժերից «Ժառանգություն» կուսակցության նախագահ Անդրանիկ Գրիգորյանը «Առաջին լրատվական»-ի հետ զրույցում, մեկնաբանելով ՍԴ որոշումը, նշեց. «Ինչպես գիտեք՝ դեռ որոշումն ամբողջությամբ հրապարակված չէ, միայն վերջնահատվածն է հրապարակված։ Մենք սպասում ենք վճռի վերջնական հրապարակմանը, կունենանք քննարկում ու մեր տեսակետը կհայտնենք։ Հապշտապ արված եզրահանգումները վնաս են մեր պետականությանը»։
Մեր այն դիտարկմանը, թե «Ժառանգությունն» արդյոք կիսո՞ւմ է այն մոտեցումը, որ Սահմանադրական դատարանը դեռ ծառայում է նախորդ իշխանությանը, և նրա կայացրած որոշումները լեգիտիմ համարվել չեն կարող, Գրիգորյանը պատասխանեց. «Ընդհանրապես գործող Սահմանադրության հետ կապված կա լեգիտիմության խնդիր։ Այս Սահմանադրությունը ընդունվել է կեղծիքներով, և Հայաստանում թե՛ կառավարման և թե՛ սահմանադրական ճգնաժամի հիմքում ընկած է 2015 թվականին կեղծիքներով ընդունված Սահմանադրությունը։ Բայց օրինականության հաստատման գործում պետք է հետքայլ չլինի և Հայաստանում սկսված փոփոխությունների գործընթացը միայն ու միայն իրավական ճանապարհով լուծվի, որտեղ չպետք է տեղ ունենան դատարանների փակումը և մի շարք այլ հապշտապ որոշումներ, որոնք կատարվել են իշխանությունների կողմից»։
«Ժողովրդավարական հայրենիք» կուսակցության անդամ Պետրոս Մակեյանը «Առաջին լրատվական»-ի հետ զրույցում, մեկնաբանելով ՍԴ-ի որոշումը, ասաց. «Սահմանադրական դատարանի անդամների մեծ մասը, բացառությամբ վերջում ընտրված մեկ-երկուսի, հանցակից են Քոչարյանի ու Սերժ Սարգսյանի բանդային։ Փաստագրական մի բան ևս նշեմ՝ 1998 թվականի հունիս-հուլիս ամիսներին «Հայրենիք» պատգամավորական խումբը նախաձեռնեց և դիմեց Սահմանադրական դատարան «ԱրմենՏելի» 24 հոդվածը հակասահմանադրական ճանաչելու, ՍԴ-ն բավարարեց ու ճանաչեց հակասահմանադրական։ Հետո երբ մենք նախաձեռնեցինք փոխել այդ օրենքը, Ռոբերտ Քոչարյանը թույլ չտվեց, այսինքն՝ առաջինը հենց ինքն է ՍԴ որոշումն առ ոչինչ արել»։
Ինչ վերաբերում է այս որոշմանը, ապա ըստ Մակեյանի՝ այն որևէ արժեք չունի. «ՍԴ որոշումն առաջինը 1998 թվականին արհամարհել է իրենց միակ տղամարդ համարող Ռոբերտ Քոչարյանը։ Իրենց ընդունածն առ ոչինչ է, ասել լեգիտիմ՝ կնշանակի գնահատական տալ։ Իրենք այդ բանդայի հետ հանցակից են»։