Աննախադեպ հանդիպում նախագահի նստավայրում. Սերժ Սարգսյանն այսօր առաջին անգամ ընդունել է Ազգային ժողովի ղեկավար կազմին: Հանդիպմանը ներկա են եղել խորհրդարանի նախագահը, խմբակցությունների ղեկավարներն ու մշտական հանձնաժողովների նախագահները: Բացակայում էին միայն «Ելք»-ի անդամները:
Իր ելույթում նախագահը գոհունակություն է հայտնել խորհրդարանի աշխատանքից. անցած տարվա մայիսի 18-ից ի վեր ընդունվել է 286 օրենք, որոնցից 15-ը լիովին նոր օրենքներ են, ապա կոչ արել չբավարարվել սրանով: Սերժ Սարգսյանի գնահատմամբ, Ազգային ժողովը պետք է հանդես գա որպես մեծամասնության եւ փոքրամասնության երկխոսության եւ համատեղ աշխատանքի կարեւոր հարթակ, բայց միշտ չէ, որ ամեն ինչ հարթ եւ սահուն է ընթանում: Այնուհետեւ նա անդրադարձել է այս օրերին ամենաշատը քննարկվող թեմային՝ գնաճին. հիշեցրել է օրեր առաջ հրավիրված խորհրդակցության մասին եւ դիմել ներկաներին:
Մինչեւ այս տարվա մարտի 9-ն Ազգային ժողովը կընտրի Հայաստանի Հանրապետության չորրորդ նախագահին: Սերժ Սարգսյանը հույս է հայտնել, որ նոր սահմանադրական ընթացակարգով նախատեսված այս ընտրություններին Ազգային ժողովի բոլոր պատգամավորները կմոտենան ամենայն պատասխանատվությամբ եւ նախագահը կընտրվի խարհրդարանական ընդարձակ համաձայնության պայմաններում:
Ուղիղ 3 տարի առաջ այս օրը Հայաստանը ցնցվեց Գյումրիում կատարված ոճրագործությունից. ռուս զինծառայող Վալերի Պերմյակովը մտել էր Ավետիսյանների տուն եւ դաժանաբար սպանել ընտանիքի բոլոր անդամներին, անգամ մանկահասակ Հասմիկին եւ Սերյոժային: Ամիսներ տեւած դատաքննության ավարտին դատարանը Պերմյակովին ցմահ ազատազրկման դատապարտեց, ավելի ուշ նա տեղափոխվեց Ռուսաստան՝ պատժի մնացած մասն այնտեղ կրելու: Դեպքից 3 տարի անց, սակայն, սպանվածների հարազատները շարունակում են կարծել, որ իրական հանցագործները պատժված չեն: Այսօր նույնպես Ավետիսյանների տանը ոչ ոք չի ապրում: 2015թ. հունվարի 12-ից հետո այստեղ ոչնչի հարազատները ձեռք չեն տվել, մաքրել են արյան հետքերը, ավելացրել Ավետիսյանների լուսանկարները:
«Զվարթնոց» օդանավակայանի աշխատանքն այսօր վաղ առավոտից կաթվածահար էր եղել: Անբավարար տեսանելիության հետեւանքով մի քանի վայրէջքներ չէին իրականացվում: Հետաձգվել էին Դուբայ-Երեւան, Մոսկվա-Երեւան, Շարժա-Երեւան, Թբիլիսի-Երեւան, Վորոնեժ-Երեւան չվերթները: Ինքնաթիռները Երեւան են ժամանել ուշացումով:
Հայաստանի ֆուտբոլի ֆեդերացիայի նախագահ Ռուբեն Հայրապետյանը չի պատրաստվում հրաժարական ներկայացնել: Այս մասին նա հայտարարել է լրագրողների հետ հանդիպմանը: 2015թ.-ի նոյեմբերի 30-ին երկրպագուների հետ զրույցում Հայրապետյանը հավաստիացրել էր՝ եթե Հայաստանի հավաքականը չնվաճի աշխարհի առաջնության ուղեգիրը, հրաժարական կտա: Հավաքականը, բնականաբար, ուղեգիր չի նվաճել, հետեւաբար, Հայրապետյանը խոստումը չի կատարում: Թե ինչու է ֆեդերացիայի նախագահը մնում, բացատրել է հետեւյալ կերպ:
Ասուլիսի ժամանակ Ռուբեն Հայրապետյանը խոսել է նաեւ «Լոռի» - «Էրեբունի» պայմանավորված լինելու մեջ կասկածվող խաղի, Հենրիխ Մխիթարյանի՝ «Մանչեսթեր Յունայթեդում» չխաղալու, Սամվել Կարապետյանի՝ հայկական ֆուտբոլում ներդրումներ կատարելու մասին:
Facebook-ը կնվազեցնի տեղեկատվական եւ գովազդային հրապարակումների նշանակությունը: Այս մասին հայտնել է կայքի հիմնադիրը: Մարկ Ցուկերբերգը նշել է, որ ցանցն առավել պետք է ուղղված լինի օգտատերերի անձնական շփումներն ակտիվացնելուն, մինչդեռ վերջին ժամանակահատվածում այն ծառայում էր ավելի շատ որպես մեդիա հարթակ: Նա չի բացառել, որ այս փոփոխություններից հետո մարդիկ ավելի քիչ ժամանակ կանցկացնեն Facebook-ում:
«Սակայն ես նաեւ հույս ունեմ, որ ժամանակը, որը դուք այստեղ կանցկացնեք, ավելի արժեքավոր կդառնա»,- ասել է Ցուկերբերգը:
Դոլարն էժանացել է մոտ 1 դրամով, իսկ եվրոն թռիչքաձեւ աճ է գրանցել: Հունվարի 12-ին դոլարի փոխարժեքը կազմել է 483 դրամ, եվրոյինը՝ 586, ռուբլունը՝ 8 դրամ 55 լումա, ֆունտինը՝ 658 դրամ:
Հանրապետության տարածքում հունվարի 13-ի գիշերն առանձին շրջաններում ժամանակ առ ժամանակ սպասվում են տեղումներ: Օդի ջերմաստիճանն էապես չի փոխվի: Երեւանում հնարավոր են տեղումներ, գիշերային ժամերին՝ թաց ձյան տեսքով: Մայրաքաղաքում գիշերը կդիտվի 0-2, ցերեկը՝ +8+10 աստիճան տաքություն:
