Մենք ունենք բացառիկ հնարավորություն՝ չհակադրել ժողովորդավարությունն ու անվտանգությունը. Արմեն Ռուստամյան
ՀՅԴ խմբակցության ղեկավար Արմեն Ռուստամյանը, խորհրդարանում իրենց խմբակցության անունից ելույթ ունենալով՝ անդրադարձավ իր գործընկեր Աղվան Վարդանյանի հայտարարությանը, թե քվեարկությանը չի մասնակցելու։ Այդ հայտարարությունն, ըստ Ռուստամյանի, անակնկալ էր նաև իրենց խմբակցության համար։
«Մենք հարգում ենք պատգամավորի սահմանադրական իրավունքը, որ նա կարող է քվեարկել իր խղճով և համոզումով, բայց սա Հայ հեղափոխական դաշնակցությունն է և ունի իր ավանդույթները, նրա կատարած քայլը այդ ավանդույթին դեմ էր, մենք այդ պահվածքին համապատասխան գնահատական կտանք» ,- ասաց նա։
Ռուստամյանը տեղեկացրեց, որ ՀՅԴ խմբակցությունը որոշել է և այսօր քվեարկելու է հօգուտ Նիկոլ Փաշինյանի, նպատակը մեկն է՝ հասնել այնպիսի հանգուցալուծման, որից կշահի ողջ ժողովուրդը՝ Հայաստանում, Արցախում և Սփյուռքում։
Նա հիշեցրեց՝ իրենք նախկինում էլ պնդում էին, որ նոր կառավարման համակարգով երկրում բան է փոխվելու, և արատավոր բարքերը փոխելու համար անհրաժեշտ է նախ փոխել կարգերը, օր առաջ հաստատել նոր կարգեր։
«Մենք պնդում էինք, որ հնից ազատվելու համար երկրում պետք է նոր կարգեր հաստատել։ Աստվաշածունչն ասում է՝ նոր գինին հին տիկերի մեջ չեն լցնում, որովհետև կպատռի հին տիկերը, այդպես էլ եղավ, բայց ինչպես ասում են՝ շաբաթը ուրբաթից շուտ եկավ, ունենք նոր ֆորսմաժորային իրավիճակ, որ անհապաղ լուծումներ է պահանջում։ Սերժ Սարգսյանը իր հրաժարականով դրա համար դուռ բացեց և ապացուցեց, որ վարչապետի պաշտոնի ստանձնումը նեղ հատվածական շահ չէր հետապնդում, հիմա հանրապետականի հերթն է՝ ապացուցել, որ նեղ կուսակցական շահ չի հետապնդում և պատրաստ է գնալ խաղաղ հանգուցալուծման ճանապարհով»,- ասաց նա։
Համաժողովրդական շարժման պայքարի առաջին փուլն, ըստ Ռուստամյանի, կարելի է բնորոշել որպես «հինը մերժելու փուլ», և դա որոշ չափով իրագործված է, այժմ արարման փուլն է, և պարտավոր են անցյալի սխալները չկրկնել, թույլ չտալ, որ համաժողովրդական զարթոնքի ուժը մսխվի, ժողովուրդը հիասթափվի։ Ըստ ՀՅԴ խմբակցության ղեկավարի՝ այս փուլը հաջողելու գրավականը նախ արտաքին ուժերի միջամտությունը բացառելն է, հասարակությունը օտարների և յուրայինների չբաժանելը, միասնաբար առաջ ընթանալը, սա պետք է լինի հաղթանակ, որի մեջ իրենց դերակատարությունն են բերում բոլորը։
Ռուստամյանը տեղեկացրեց, որ իրենք Նիկոլ Փաշինյանի հետ խոսել և համաձայնեցրել են այս փուլի սկզբունքային ու առաջնային նշանակություն ունեցող մի շարք կարևորագույն հարցեր, խաղաղ հանգուցալուծման ներքաղաքական այնպիսի գործընթաց, որը չի վտանգի մեր դիրքերն ու պաշտպանունակությունը ղարաբաղյան ճակատում։
Նրա խոսքով՝ ԼՂ հակամարտությունը պետք է կարգավորվի այն սկզբունքներով, որոնցում ընկած է Արցախի ժողովրդի՝ հանրաքվեով արդեն իսկ արտահայտած կամքը, ընտրական համակարգը պետք է բարեփոխվի՝ ռեյտինգային ընտրակարգի վերացումով, հաջորդ հարցերն են՝ խորհրդարանական կառավարման համակարգի հետագա զարգացում՝ ուղղված իշխանության լիարժեք ապակենտրոնացմանը, համազգային շահերից բխող հայ-թուրքական հարաբերությունների կարգավորում, Հայոց ցեղասպանության ճանաչման հետևողական գործընթացի շարունակություն, ԵՄ, ԵԱՏՄ և ՀԱՊԿ շրջանակներում գործընկերային հարաբերությունների շարունակում։
«Ոչ ոք դեմ չի կարող լինել ժողովրդի իշխանությունը հաստատելու նպատակին, բայց դա խաղաղ և անցնցում կատարելը պահանջում է, որ այն իրականացվի մտածված, բոլոր կողմերի ընդգրկմամբ և համախոհությամբ։ Մենք ունենք բացառիկ հնարավորություն՝ չհակադրել ժողովորդավարությունն ու անվտանգությունը, այլ ճիշտ հակառակը՝ ամրապնդել թե մեկը, թե մյուսը»,- ասաց նա։
Հարակից հրապարակումներ`
- Արմեն Աշոտյան. Եկեք նոր գինին չփորձենք լցնել հին տակառների մեջ
- Բեքարյանն առաջարկում է, որ Փաշինյանն ինքնաբացարկ հայտնի
- Այս պահին տրամաբանության ու արդարության սկզբունքների հետ կապված լրջագույն խնդիր կա. Մ. Հակոբյան
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին