Հիվանդանոցում մահացել է HSBC բանկի կողոպուտի ժամանակ վիրավորված ոստիկանը։ Այդ մասին ֆեյսբուքում գրել է ոստիկանության լրատվության վարչության պետ Աշոտ Ահարոնյանը։

«Ավաղ, բժիշկներին չհաջողվեց փրկել ավազակային հարձակում կատարածի արձակած գնդակից հրազենային վնասվածք ստացած ոստիկանի կյանքը։ Ոստիկանության ավագ ենթասպա Արա Շախգուլյանը, չնայած վիրահատությանն ու բժիշկների բոլոր ջանքերին, մահացավ։ Երկու երեխաների հայր, ՊՊԾ ջոկի հրամանատարը համակարգում էր 2000 թվականից»,- նշել է նա։

Նշենք, որ Արա Շախգուլյանը դեպքից հետո տեղափոխվել էր «Արմենիա» բժշկական կենտրոն: Այստեղից մեզ հայտնեցին, որ նրա վիրավորումը կյանքի հետ անհամատեղելի էր:

Այս պահին մեկ վիրավորի՝ բանկի անվտանգության աշխատակցին վիրահատում են։

Ավելի վաղ ոստիկանությունը հայտնել էր, որ մայիսի 3-ին, ժամը 14.25-ի սահմաններում ոստիկանություն ահազանգ է ստացվել, որ HSBC բանկի` Կոմիտասի պողոտա-Գյուլբենկյան փողոց խաչմերուկում գտնվող մասնաճյուղի վրա ավազակային հարձակում է կատարվել: Պարզվել է, որ հանցագործություն կատարած անձը Ճանապարհային ոստիկանության տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանն է:

• Հարձակում HSBC բանկի վրա. ենթադրյալ հանցագործը վնասազերծվել է եւ բերման ենթարկվել (ուղիղ, Ֆոտո)
• HSBC բանկի վրա հարձակում գործողը եղել է դանակով, նռնակով ու հրացանով զինված. Նոր մանարամասներ (Ֆոտո)