Ձեր վստահելի աղբյուրը

ՀՀԿ-ական պատգամավոր Միհրան Պողոսյանը բացառում է, որ իր օգնականն իր իսկ կողմից հրահանգ է ստացել ցուցարարների մեքենաներ ջարդել: Հանրապետական գործիչը հույս ունի, որ իրավապահ մարմիններն անաչառ կլինեն և առաջիկա օրերին լույս կսփռեն իր օգնականի ձերբակալման դրվագի վրա՝ միաժամանակ ամենախիստ պատիժ սահմանելով իրավախախտների նկատմամբ: Այս մասին նա ասաց այսօր՝ լրագրողների հետ զրույցում:

Հիշեցնենք, որ ապրիլի 21-ին՝ ժամը 13:30-ի սահմաններում, քաղաքացիները բողոքի ակցիայի շրջանակներում մասամբ փակել էին Երևան քաղաքի Ուլնեցու փողոցի ավտոճանապարհի երթևեկելի հատվածը, ինչի ժամանակ նրանց է մոտեցել «Պորշ» մակնիշի երկու ավտոմեքենա: Նշված ավտոմեքենաներից իջել են մի խումբ անձինք և մահակներով հարվածել փողոցը փակած ավտոմեքենաներին և վարորդներին: Ըստ տեղեկությունների՝ այդ անձանցից մեկը եղել է Պողոսյանի օգնական Անդրանիկ Իսոյանը:

Հարցին՝ կարո՞ղ էր նշված անձը գործել առանց իր գիտության, պատգամավորը պատասխանեց.
«Ես, իմանալով իմ օգնականին, հույս և վստահություն եմ հայտնում, որ նա այնտեղ չի եղել, և սա թյուրիմացություն է: Սակայն համոզված կարող եմ լինել միայն իմ համար: Այն բոլոր մարդկանց թվում, ում հրավիրել են ոստիկանություն, հայտնվել է նաև իմ օգնականը:

Երևի դա ինչ-որ տեղ նորմալ է, որովհետև մենք այդ օրերին շրջել ենք և զրույցներ ունեցել: Ես հորդորում եմ համապատասխան մարմիններին անաչառ լինել և որոշակի վենդետաներ չանել: Վերջիվերջո ամեն ինչ պարզվելու է, մենք ներկայացնելու ենք համապատասխան հիմքեր, թե այդ երիտասարդը որտեղ է եղել»,- նշեց Միհրան Պողոսյանը:

Լրագրողները ՀՀԿ-ական պատգամավորից հետաքրքրվեցին՝ ընդունո՞ւմ է, որ ցուցարարների մեքենաներ ջարդած մարդիկ հրահանգավորված անձինք են եղել: «Իմ կարծիքը հետևյալն է. կարող են հրահանգավորված լինել, կարող է՝ ճանապարհը մեկը փակել է, և եղել է որոշակի վեճ ու բախում: Այսպիսի կարծիքներ կարող են բազմաթիվ լինել: Իմ խորին համոզմամբ, օգնականս նման բան չի արել, բայց ես պաշտոնական հայտարարություն անել չեմ կարող»,- նշեց Միհրան Պողոսյանը:

Իսկ հնարավոր համարո՞ւմ է, որ օգնականը հայտարարի՝ հրահանգ ստացել է անձամբ իրենից, հարցրեցին լրագրողները: «Ես բացառում եմ, որ իմ օգնականը հայտարարկի, որ հրահանգ է ստացել իմ կողմից, որովհետև նման բան չկա»,- ասաց ՀՀԿ-ական գործիչը: