Օրերս Երևանի պետական համալսարանում հայ-իրանական բարեկամության կաբինետի բացման միջոցառման ժամանակ Հայաստանում Իրանի արտակարգ և լիազոր դեսպան Սեյեդ Քազեմ Սաջադին ուշագրավ հայտարարություն է արել այն մասին, որ Իրանը պատրաստ է Հայաստանին «հարմար գնով» իրանական գազ մատակարարել։
Իրանագետ, ՄԱՀՀԻ փորձագետ Արմեն Վարդանյանը հիշեցնում է, որ Իրանի թե նախկին, թե ներկայիս դեսպանները մի քանի անգամ հայտարարել են Հայաստանին իրանական գազ մատակարարելու մասին, որին, սակայն միշտ հաջորդել են Հայաստանի կառավարության ներկայացուցիչների այն արձագանքները, թե դեռևս ռուսական գազից էժան գազ Հայաստանին որևէ երկիր չի առաջարկել։
«Քանի որ Իրանի դեսպաններն որևէ հստակ գին չեն նշում, թե քանի դոլարի դիմաց են պատրաստ գազ վաճառել Հայաստանին, այլ միայն ասում են «հարմար գներով» կարող ենք մատակարարել, հետևաբար մենք՝ փորձագետներս , չենք կարող հստակ ասել, թե որտեղ է թաղված շան գլուխը, այսինքն՝ իրանական կողմն է ճիշտ ասում, թե հայկական կողմը, որովհետև չգիտենք «հարմար գին» ասելով՝ իրանցիները կոնկրետ ինչքան նկատի ունեն և հիշենք նաև, որ Հայաստանում Իրանի նախկին դեսպանն էլ ասում էր, թե այդ գինը կախված է բանակցություններից»,- «Առաջին լրատվական»-ի հետ զրույցոմ ընդգծեց Արմեն Վարդանյանը։
Այսուհանդերձ, Արմեն Վարդանյանի վստահեցմամբ՝ դեսպանի այսպիսի հայտարարությունը ևս մեկ անգամ փաստում է այն մասին, որ Իրանը միանշանակ պատրաստ է մեծացնել իր էներգետիկ համագործակցությունը Հայաստանի հետ։
Այս համատեքստում մեր զրուցակիցը նաև նկատեց, որ մյուս կողմից՝ ռուսական «Գազպրոմ» ընկերության մենաշնորհային դիրքը Հայաստանի գազային ոլորտում կարող է լուրջ խոչընդոտ հանդիսանալ հայ-իրանական էներգետիկ ոլորտի համագործակցության համար։
«2013թ-ին կնքվեց այն հայտնի ստրկատիրական պայմանագիրը Հայաստանի և «Գազպրոմ»-ի միջև, ըստ որի՝ մինչև 2040թ-ը Հայաստանը չի կարող որևէ այլ երկրից գազ գնել՝ առանց «Գազպրոմ»-ի թույլտվության, ինչը շատ մեծ խոչընդոտ է մեզ համար։ Էներգետիկ ոլորտը լուրջ լծակ է Ռուսաստանի ձեռքում՝ Հայաստանի վրա ճնշումներ գործադրելու համար և Ռուսաստանն երբեք ինքնակամ չի հրաժարվի այդ լծակներից։
Որոշակի փոքր քանակներով իրանական գազի ներմուծում Հայաստան՝ հատկապես միայն Սյունիքի շրջանում՝ հնարավոր է, բայց որ ռուսական գազն ամբողջությամբ մեր երկրում փոխարինվի իրանականով՝ ես այդպիսի հնարավորություն ներկայումս չեմ տեսնում»,- ասաց Վարդանյանն ու նաև հավելեց, որ սրանով Իրանը փորձում է անցնել ռուբիկոնը։
Վերջինս անդրադարձավ նաև «Գազպրոմ»-ի այն մանիպուլյացիոն քայլին, թե նրանք Հայաստանին իբրև ամենաէժան գնով են գազ մատակարարում, որը, սակայն, իրականությանը չի համապատասխանում։
Մանրամասները՝ տեսանյութում։
