×
2,907
Երբեւէ մտածել եք, թե ինչի կարող է հասցնել կնոջը սիրելիի դավաճանությունը: Նույն պատերը, ժամացույցը, դրսի աղմուկն ու վերելակը, եւ ամեն օր նույն սպասումը՝ տղամարդու, սիրո, ուշադրության... Երբեւէ սիրե՞լ եք այնքան մոլեգին, որ պատրաստ լինեք քայլել դժոխքի կրակների միջով. այս ոչ սովորական հարցերի հնարավոր պատասխանով Հակոբ Պարոնյանի անվան երաժշտական կոմեդիայի պետական թատրոնի բեմում է դերասանուհի Նարինե Ալեքսանյանը: Հունիսի 4-ին Ժան Կոկտոյի՝ սիրո, ստի, ցասումի եւ անսպասելիության մասին պատմող «Նա» մոնոներկայացման առաջնախաղն էր՝ բեմադրիչ Վարդգես Բարսեղյանի մեկնաբանությամբ:
«8 տարի է, ինչ աշխատում եմ՝ որպես դերասան, բայց մասնագիտությամբ ռեժիսոր եմ եւ արդեն երկար ժամանակ է, որ չէի ստեղծագործել: Զգացի՝ ժամանակն է: Որոշեցի մոնոներկայացում անել եւ Ժան Կոկտոյի գործերից ընտրեցի հենց այս մեկը: Կնոջ տեսանկյունից է ներկայացվում իրավիճակը՝ նրա ապրումները, տղամարդ-կին հարաբերությունների կոնֆլիկտը, կնոջ մտքերը, եւ ինձ պետք էր գտնել մեկին, ով իմ պատկերացրածը կկարողանար մատուցել: Դերն առաջարկեցի Նարիներին: Բարեբախտաբար, նա մի քանի օր մտածելուց հետո համաձայնեց: Այն եզակի դեպքերից է, որ շատ լավ ստեղծագործում եւ աշխատում ենք՝ ունենալով շատ տարաբնույթ կարծիքներ եւ քննարկումներ: Թատրոնի ղեկավարությունն ինձ՝ դեբյուտային աշխատանք ներկայացնող ռեժիսորին, օգնեց ստանալ իմ երեւակայած ներկայացումը», - նշեց բեմադրիչը:
Նարինե Ալեքսանյանը եւ բեմադրիչ Վարդգես Բարսեղյանը
Բեմում կնոջ խառը եւ անսպասելի որոշումներ եւ ապրումներ են, որոնք գուցե կարող է ունենալ յուրաքանչյուրը, եթե հայտնվի նմանատիպ իրավիճակում: Այս պիեսին Նարինեն ծանոթ էր վաղուց, բայց երբեւէ մտքով չէր անցում, որ կխաղա այն, առավել եւս՝ հիմա:
«Մոնոներկայացում խաղալու մտադրություն չունեի: Գիտեի, որ Վարդգեսը փորձեր է անում թատրոնում, հետո որոշեց, որ ես պետք է խաղամ: Տվեց պիեսն ու ասաց՝ եթե ցանկություն կունենամ խաղալու, սիրով կաշխատենք, եթե՝ ոչ, խնդիր չկա: Կարդացի, սկզբում այդքան էլ տպավորված չէի, քանի որ պիեսի շարունակական շղթան ինձ չէր հուզում: Անմիջապես պատասխան չտալու համար որոշեցի վերընթերցել: Մեկ անգամ եւս կարդացի եւ հանկարծ հասկացա, որ այն, ինչը կատարվելու է բեմում, պետք է այսպես լինի՝ ո՛չ սովորական զարգացման շղթայով, ո՛չ սովորական գրված ձեւով, եւ դա ինձ սկսեց հուզել: Վարդգեսը համաձայնեց, եւ մենք սկսեցինք միասին տող առ տող կառուցել պիեսի շղթան եւ ստացանք այն, ինչ հիմա ունենք»,-ասաց դերասանուհին:
Նարինեի խոսքով՝ որքան էլ Կոկտոյի պիեսը գրված է հանճարեղ, բայց այն չուներ այն վայրիվերումները, որոնք իրենք կարողացել են ստանալ: Չնայած թատրոնում երկար տարիների գործունեությանը, դերասանուհին առաջին անգամ էր հանդես գալիս մոնոներկայացմամբ.
«Թատերական բոլոր ժանրերն ինձ համար ընդունելի են եւ հասկանալի, բայց մոնոն անհասկանալի էր: Իմ պարագայում մոնոներկայացման համար անսահման նվիրում է պետք, անվերջ ու անմնացորդ: Դու ես քո հետ, քո հանդիսատեսի հետ: Դու ես քո հաջողության բանալին կամ տապալման պատճառը: Շարունակ ինքս ինձ պետք է հետեւեմ, զսպեմ, սա դժվար է, բայց իմ տարիների լավագույն շրջաններից մեկն է: Որքան էլ բեմադրիչը խնդիր տա դերասանին, նա պետք է ունենա իր ներքինը, իր վերաբերմունքը: Այստեղ ես ինքս ինձ եմ խարազանում, սիրում, հերքում եւ հաստատում»:
«Նա» ներկայացման առանձնահատկություններից մեկն այն է, որ հանդիսատեսը բեմում է նստում եւ շատ մոտիկից հետեւում դերասանուհու ապրումներին՝ դառնալով նրա զգացածի եւ շնչի կրողը: Գաղափարը Վարդգեսինն է. նախկինում եւս մի անգամ փորձել էր նման լուծում տալ, բայց չէր ստացել իր ուզած արդյունքը, իսկ այս անգամ ստացվեց: Նարինեի համար եւս առաջին փորձն էր նման պայմաններում խաղալու.«Հանդիսատեսն ինձ հետ, իմ կողքին է, ես դրանից չեմ նեղվում: Նա հիմա պարզապես ավելի մոտիկից կտեսնի իմ կնճիռները, բայց նաեւ ավելի լավ կտեսնի իմ հրճվանքը, կզգա իմ դողը, ցավն ու շնչառությունը: Մենք պետք է դառնանք մի ամբողջություն»:
«Նա» ներկայացման երաժշտության հեղինակը եւ ձեւավորողը Հարություն Հարությունյանն է, պարը բեմադրել է Արտյոմ Գեւորգյանը, բեմանկարիչը եւ հագուստի ձեւավորողը Մարիամ Մուրադյանն է:
Տեքստը՝ Արմինե Բրսոյանի/Bravo.am/
Լուսանկարները՝ Շաքե Հովհաննիսյանի/Bravo.am/
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: