Վերջին տարիներին հայկական բասկետբոլում դրական տեղաշարժերը բավական մեծ են։ Հայաստանի տարբեր տարիքային հավաքականները հաջող են ելույթ ունենում Եվրոպայի և աշխարհի առաջնության ընտրական փուլերում։ Երկրորդ տարին անընդմեջ անցկացվում է Ա լիգայի կանոնավոր առաջնությունը, որը ոչ միայն մեծ հետաքրքրություն է առաջացրել հասարակության շրջանում, այլև շարունակ թափ է հավաքում։ Նշենք, որ Սփյուռքի շրջանում հայկական բասկետբոլն ունի մեծ պոտենցիալ, որը էապես նպաստում է Հայաստանում մարզաձևի զարգացմանը։ Այս օրերին Հայաստանի բասկետբոլի ֆեդերացիայի գլխավոր քարտուղար Արթուր Նազարյանը գտնվում էր ԱՄՆ-ում։
– Պարոն Նազարյան, ի՞նչ նպատակով էիք մեկնել ԱՄՆ:
– Վերջին տարիներին Հայաստանի բասկետբոլի ֆեդերացիան ակտիվորեն աշխատում է, որ Սփյուռքը ներկայացնող հայ բասկետբոլիստները համալրեն տարբեր տարիքային հավաքականները: Այդ առումով ԱՄՆ-ում մենք հսկայական ներուժ ունենք, որը պետք է կարողանանք առավելագույնս օգտագործել: Ես շուրջ չորս տարի չէի եղել Միացյալ Նահանգներում, և կային բազմաթիվ հարցեր, որոնք պետք է քննարկվեին տեղի հայկական համայնքի ներկայացուցիչների հետ: Ունեցա մի քանի տասնյակ հանդիպումներ հայ խաղացողների և նրանց ծնողների, մարզիչների և բասկետբոլի հետ առնչվող այլ անձանց հետ: Կարող եմ ասել, որ մեր բասկետբոլային ներուժը շատ ավելի մեծ է, քան մեզ թվում է, այդ ներուժը օրեցօր աճում է, և մենք պետք է կարողանանք օգտագործել այն:
– Ինչպե՞ս եք պատկերացնում այդ ներուժի օգտագործումը հայկական բասկետբոլում:
– Նախ նշեմ, որ բասկետբոլը միջոց է, որ կարողանանք ավելի ամուր կապել Հայաստանը ամերիկահայության հետ: Կարելի է ասել, որ գլխավոր նպատակը հենց դա է, քանի որ բասկետբոլի միջոցով հարյուրավոր հայ պատանիներ ու երիտասարդներ այցելում են Հայաստան, սկսում են ավելի խորն ուսումնասիրել իրենց արմատները: Իսկ եթե նայենք զուտ սպորտային մասով, ապա Հայաստանն էլ կարող է զգալի օգուտ տալ նրանց, ովքեր լուրջ նպատակներ ունեն բասկետբոլում: Կոնկրետ ԱՄՆ-ում համալսարանն ավարտելուց հետո հայ բասկետբոլիստները կա՛մ պետք է հայտնվեն ՆԲԱ-ում, կա՛մ տեղափոխվեն արտասահման, որ կարիերան կարողանան շարունակել որևէ ակումբում, այլապես ստիպված են լինելու դառնալ սիրողական մակարդակի խաղացող և գործունեություն ծավալել այլ ոլորտում: Եվրոպական որևէ ակումբում հայտնվելու համար ներկայումս հայազգի խաղացողները կարող են նախ՝ հանդես գալ Հայաստանում, օրինակ՝ Ա լիգայում, որտեղ իրենց ցույց տալու դեպքում շատ արագ առաջարկներ կունենան եվրոպական թիմերից: Լավ հեռանկարներ են ստեղծվում նաև տարբեր տարիքային հավաքականներում հանդես գալու համար: Չմոռանանք, որ Եվրոպայում գործում է ոչ եվրոպացի խաղացողների սահմանափակում, ինչը չի տարածվում ՀՀ քաղաքացիների վրա: Ինչ վերաբերում է մարզիչներին, ապա ԱՄՆ-ում աշխատող հայ մասնագետները կարող են տարվա ընթացքում այցելել Հայաստան և իրենց գիտելիքների մեծ պաշարը ու փորձը փոխանցել ՀՀ-ում աշխատող մասնագետներին: Խոսքը վերաբերում է հատկապես մանկապատանեկան բասկետբոլում աշխատողներին, քանի որ այս հարցում մենք շատ մեծ բաց ունենք: Ես հիմնականում հանդիպումներ ունեցա Կալիֆոռնիա նահանգում և կարող եմ ասել, որ տասը-տասներկու օրը բավական չէ բոլոր ծրագրերը քննարկելու համար: Ներկայումս փորձում ենք ներկայացուցիչ ունենալ Լոս Անջելեսում, որը ամենօրյա կապի մեջ կլինի հայ խաղացողների ու մարզիչների հետ, տեղում կպատասխանի նրանց հուզող հարցերին: ԱՄՆ-ում այսօր գրեթե երկու միլիոն հայ է ապրում: Չմոռանանք, որ խոսքը աշխարհի ամենահզոր բասկետբոլային երկրի մասին է: Ահռելի աշխատանք կա կատարելու, որը մեր փոխարեն ոչ ոք չի անելու:
– Դուք Լոս Անջելեսում հանդիպել եք նաև Կլիպերսի մարզիչ Ռեքս Կալամյանի հետ:
– Ռեքսի հետ վաղուց ենք կապի մեջ և այս անգամ վերջապես հանդիպեցինք: Նա բավական հայրենասեր անձնավորություն է և մեծ ցանկություն ունի օգտակար լինելու հայկական բասկետբոլին: Ռեքս Կալամյանը կփորձի օգտագործել իր հեղինակությունը, որ ավելի մեծ թվով անձանց ներգրավի հայկական բասկետբոլի զարգացմանը միտված ծրագրերին: Նա գերծանրաբեռնված աշխատանք ունի, ինչը թույլ չի տալիս նրանց երկար ժամանակով այցելել Հայաստան: Ռեքս Կալամյանն այսօր ամենաճանաչված հայն է և ամերիկյան բասկետբոլում բավական լուրջ ազդեցություն ունի:
– Իսկ ֆինանսական աջակցություն ցուցաբերո՞ւմ են ԱՄՆ-ում բնակվող մեր հայրենակիցները։
– Մենք մշակել ենք մարզերում բասկետբոլի զարգացման ծրագիր, որով աջակցություն ենք ակնկալում բացառապես մարզերում գործող մանկապատանեկան թիմերի համար: Այսօր գրեթե բոլոր մարզերում ունենք բասկետբոլով զբաղվող տասնյակ խմբեր, որոնք աջակցության կարիք ունեն: Այս խնդիրը լուծելու դեպքում մեր տարիքային առաջնություններում զգալիորեն կավելանան մարզային թիմերը: Ի դեպ, վերջերս Արթիկի մարզադպրոցի դահլիճը նոր, ժամանակակից հատակ ունեցավ, որտեղ անցկացվում են Ա լիգայի հանդիպումներ: Այդ ամենն իրականացվեց ամերիկահայ բարերարի միջոցներով: