Սերժ Սարգսյանը երկուշաբթի երկօրյա պաշտոնական այցով կմեկնի Վրաստան: Այցի շրջանակներում Հանրապետության Նախագահը հանդիպումներ կունենա Վրաստանի նախագահ Գիորգի Մարգվելաշվիլիի, վարչապետ Գիորգի Կվիրիկաշվիլիի, խորհրդարանի նախագահ Իրակլի Կոբախիձեի, ինչպես նաև Համայն Վրաստանի Կաթողիկոս-Պատրիարք Իլյա Երկրորդի հետ:
Սարգսյանը կայցելի նաև «Հովհաննես Թումանյանի տուն» գիտամշակութային կենտրոն և Սուրբ Գևորգ եկեղեցի, որտեղ հանդիպում կունենա հայկական համայնքի ներկայացուցիչների հետ:
Մինչ Սարգսյանի այցին անդրադառնալը` հիշեցնենք, որ դեկտեմբերի 1-ին նշանակված էր Վրաստանի վարչապետ վարչապետ Գիորգի Կվիրիկաշվիլիի այցը Երևան, սակայն այն չեղարկվեց բառացիորեն այցից ժամեր առաջ` հենց այն պատճառաբանությամբ, որ դեկտեմբերի 25-ին նախատեսված էր Սերժ Սարգսյանի այցը Թբիլիսի: Իհարկե, այդ այցի չեղարկումից հայ-վրացական հարաբերությունները չտուժեցին, սակայն քաղաքական դիսկոմֆորտի մեջ հայտնվեց Կարեն Կարապետյանը, որին վրացական կողմն, ըստ էության, նրբանկատությամբ հասկացրեց, որ ավելի մեծ կարևորություն է տալիս ոչ թե նրա հրավերին, այլ` հենց Սերժ Սարգսյանի այցին:
Երկուշաբթի մեկնարկելիք այցը կարող է պատմական դառնալ` այն առումով, որ հայ-վրացական բարձր մակարդակի առաջին շփումն է Հայաստան-Եվրամիություն համաձայնագրի ստորագրումից հետո: Այս հանգամանքը նոր որակ, բովանդակություն է հաղորդում հայ-վրացական հարաբերություններին` դրանց հաղորդելով իրապես ռազմավարական բնույթ` քաղաքակրթական շեշտված բաղադիրչով:
Հայաստանն ու Վրաստանն, անշուշտ, եվրաինտեգրման տարբեր մակարդակներ ունեն, սակայն այդ հարթության վրա տարածաշրջանում բացառիկ դաշնակիցներ են: Վրաստանի հարևան երկրներից որևէ մեկը ԵՄ-ի հետ չունի այնքան խորը հարաբերություն, որքան` ԵՏՄ անդամ Հայաստանը: Մյուս կողմից` հարևան Վրաստանը Հայաստանի համար անփոխարինելի հարթակ է` արևմտյան կառույցների, հատկապես` Եվրամիության և ՆԱՏՕ-ի հետ արդյունավետ համագործակցություն ծավալելու համար:
Հայաստան-Եվրամիություն համաձայնագրի ստորագրումից հետո տարածաշրջանում ձևավորվել է նոր ստատուս-քվո, որն ավելի է մերձեցում Երևանի և Թբիլիսիի հարաբերությունները և, անշուշտ, այս համատեքստում Սերժ Սարգսյանի այցը դրական սպասումներ է առաջացնում` հատկապես, որ Հայաստանի նախագահի այցին նախորդել է Վրաստանի վարչապետի համարձակ քայլը, որն, ըստ էության, նպաստում է Հայաստանի տնտեսական շրջափակման ճեղքմանը: Օրերս Գեորգի Կվիրիկաշվիլին հայտարարել է, թե հայկական ապրանքները ֆորս-մաժորային իրավիճակներում կարող են փոխադրվել Աբխազիայի և Հարավային Օսիայի տրանսպորտային միջանցքներով: Վրաստանի քաղաքական ղեկավարությունն, անշուշտ, գիտակցել է, որ իր այս քայլը, մեղմ ասած, պոպուլյար չէ, որովհետև դրան հետևելու են ընդդիմության քննադատությունը և Անկարայի ու Բաքվի հիստերիան: Սակայն Վրաստանի կառավարությունը գնացել է այս քայլին` ինքնատիպ կերպով արձագանքելով Հայաստան-ԵՄ համաձայնագրի ստորագրմանը: Հենց այս բարենպաստ ֆոնն էլ ուղեկցելու է Սերժ Սարգսյանի պաշտոնական այցին: