Այդպես էլ պետք է լիներ, պետք է կասեցվեր այդ գործը: Այս մասին «Առաջին լրատվական»-ի հետ զրույցում նշեց գործարար Սիլվա Համբարձումյանը՝ անդրադառնալով օրերս ՀՀ երկրորդ նախագահ Ռոբերտ Քոչարյանն ընդդեմ գործարար Սիլվա Համբարձումյանի գործի կասեցմանը:
Նշենք, որ հայցադիմումը ներկայացվել էր Ռոբերտ Քոչարյանի փաստաբան Արամ Օրբելյանի կողմից՝ զրպարտություն հանդիսացող փաստացի տվյալները հերքելու և երկու միլիոն ՀՀ դրամ փոխհատուցում բռնագանձելու պահանջներով: Հայցադիմումի հիմք է հանդիսացել Սիլվա Համբարձումյանի կողմից 2018-ի նոյեմբերին «Հայացք» մամուլի ակումբում ասուլիսի ժամանակ հնչեցված հետևյալ արտահայտությունը. «Ես 2008 թվականին խոշոր գործարք եմ արել արաբների հետ և ինձ չխանգարելու համար վճարել եմ և՛ հանրապետության նախագահին՝ Քոչարյան Ռոբերտին, և՛…»:
Սիլվա Համբարձումյանը հայտարարեց, որ ինքն իր խոսքերից, իր ցուցմունքից չի հրաժարվել, ինչպես այդ մասին նշել է Օրբելյանը. «Ես իմ ցուցմունքից չեմ հրաժարվել: Այն մնում է նույնը: Ուղղակի Քոչարյանի փաստաբան Արամ Օրբելյանն իր կողմից ստեղծագործել է և փորձել է պատիվ-արժանապատվություն ստանալ, որ ես իբր մամուլում ասել եմ, հետո հրաժարվել եմ: Պարզապես ինձ խնդրել էին չխոսել, ես էլ չէի խոսում: Իսկ իրենք իմ չխոսելը դարձրին հրաժարվել, որն իրականությանը չի համապատասխանում»:
Գործարարը հավելեց, որ իրեն իսկապես «Մարտի 1-ի գործով տարել են հարցաքննության. «Դա «Մարտի 1»-ի հետ է կապված, ինձ էլ են տարել՝ իբր ես նպաստել եմ փողերի բաժանման գործընթացին, սակայն ես դրա հետ ընդհանրապես կապ չունեմ: Ես արդեն ասել եմ, որ Սամվել Մայրապետյանին 2 մլն դոլար եմ փոխանցել, դա է եղել առիթը»:
Սիլվա Համբարձումյանը պնդեց, որ մամուլի ակումբում իր արած հայտարարությունը զրպարտություն չի, իրականություն է. «Փաստաթղթով է փոխանցվել փողը: Եթե փաստաթղթով չփոխանցվեր, չէին էլ կանչի «Մարտի 1»-ի գործով: Ինձ կանչել են այնտեղ որպես դիպուկահարներին գումար տվողներին նպաստող: Բայց ես բացատրեցի, որ դա «Մարտի 1»-ի գործի հետ կապ չունի, հակառակ դեպքում ինձ էլ էին ձերբակալելու Մայրապետյանի հետ: Երբ ինձ փաստաթղթերը ցույց տվեցին, որ փողը փոխանցել եմ, ես հիշեցի՝ ինչի համար է եղել դա:
Այնպես որ, դատավորը օրինական որոշում կայացրեց՝ կասեցնելով գործը: Եթե ուրիշ բան որոշվեր, ես անօրինական կհամարեի, որովհետև ես իմ ցուցմունքից չեմ հրաժարվել: Նա պարտավոր էր կասեցնել այն»:
