ԱԺ «Իմ քայլը» խմբակցության պատգամավոր Արմեն Խաչատրյանը հանդես է եկել օրենսդրական նախաձեռնությամբ՝ առաջարկելով գաղտնալսման իրավունք վերապահել նաև ոստիկանությանը. գործող օրենսդրությամբ՝ հեռախոսային խոսակցությունների գաղտնալսման իրավունք է վերապահված բացառապես ԱԱԾ-ին:
Այս առնչությամբ Արմեն Խաչատրյանը «Առաջին լրատվական»-ի հետ զրույցում ասաց. «Առաջիկայում ևս նախաձեռնություններ են լինելու ոստիկանության գործառույթների հետ կապված, որովհետև ես կարծում եմ՝ ոստիկանությունն այսօր չունի այն անհրաժեշտ լիազորությունները, գործիքակազմը, որը հնարավորություն կտա նրան արդյունավետ իրականացնելու իր առջև դրված խնդիրները»:
Նրա խոսքով՝ դատաիրավական համակարգում վերջին 10 տարիների ընթացքում տեղի ունեցած բարեփոխումների զգալի մասը կատարվել է ոստիկանության լիազորությունների սահմանափակման հաշվին. «Եվ այսօր ոստիկանությունը ավելի շատ դարձել է հասարակական կարգի պահպանման մի ինչ-որ ծառայություն, և բոլորիս մոտ տպավորություն է, որ ոստիկանը տատիկին պետք է փողոցից փողոց անցկացնի: Մինչդեռ ոստիկանության հիմնական գործառույթը՝ հանցավորության դեմ պայքարը, ոստիկանությունն իրականացնում է շատ դժվար և բարդ մեխանիզմներով»:
Առավել մանրամասն՝ տեսանյութում:
