«Տնտեսական զարգացումները վերջին երեք տարիներին ձևավորված տրենդի մեջ են, և միտումները կարծես շարունակվում են՝ չնայած այն բանին, որ տեղի ունեցավ թավշյա հեղափոխություն, երբ թվում էր, թե ցնցումը, անկումները, գնաճային բարձր թռիչքները անխուսափելի էին»,- «Առաջին լրատվական»-ի հետ զրույցում ասաց Երևանի տնտեսագիտայան պետական համալսարանի դոցենտ, տնտեսագիտության դոկտոր Ատոմ Մարգարյանը՝ անդրադառնալով Ազգային վիճակագրական կոմիտեի հրապարակած տնտեսական ցուցանիշներին:
Մեր զրուցակցի խոսքով՝ թեպետ վերցված է տնտեսության ներառականության ուղղությունը, սակայն մենք առայժմ աղքատիկ, 3-4 մակրոտնտեսական թվերով ենք գաղափար կազմում իրավիճակի դինամիկայի վերաբերյալ:
«Այս մեկ տարվա ընթացքում հանքարդյունաբերության ոլորտում խոշորածավալ ծրագրերի կասեցումը, սառեցումը, ներդրումների դադարը անդրադարձել են արդյունաբերության ոլորտի ընդհանուր պատկերի վրա, չնայած վերամշակող արդյունաբերության որոշ ճյուղեր տպավորիչ աճեր աունեն»,- նշեց տնտեսագետը:
Ինչ վերաբերում է գյուղատնտեսությանը, Ատոմ Մարգարյանը նկատեց, որ վերջին տարիներին գյուղատնտեսությունը եղել է դեպրեսիվ վիճակում: «Իսկ ամենից աչքի զարնող թվերը ծառայությունների ոլորտինն են, հատկապես խաղային ինդուստրիայի. մեր բնակչությունը կարծես թե այսրոպեական եկամուտ ունենալու նախատրամադրվածություն ունի, և ընդլայնվում է այդ դաշտը: Սարսափելի է՝ օրական գրեթե մեկ միլիարդ դրամի ներդրումներ են կատարվում այդ ոլորտում»:
Տնտեսագետի կարծիքով՝ Հայաստանում կան ֆինանսական ռեսուրսներ, բայց չկան ինստիտուտներ, խողովակներ, մեխանիզմներ, այնպիսի հարթակներ, որոնք կդառնան երկարաժամկետ բարձր արտադրողական, մրցունակ, բարձր եկամտաբեր աշխատատեղեր. «Սա մտահոգիչ ազդակ է տնտեսական քաղաքականության ոլորտում որոշումներ կայացնողների համար»:
