Ձեր վստահելի աղբյուրը

«Բարգավաճ Հայաստան» խմբակցության պատգամավոր Սերգեյ Բագրատյանը Աժ լսումների ժամանակ, այսօր հայտարարեց, որ ոլորտը կարգավորող օրենքով այնպիսի գնումների գործընթաց է նախատեսված, որ մրցույթներոմ հաղթեն նախապես ընտրված դիմորդներ:

Այս առումով հիշատակելով «Գնումների մասին» ՀՀ օրենքի 23-րդ հոդվածը՝ պատգամավորը նկատեց. «Արտակարգ կամ չնախատեսված այլ իրավիճակի առաջացման հետևանքով ծագել է գնման անհետաձգելի պահանջ և, արտակարգ կամ չնախատեսված այլ իրավիճակից ելնելով, գնման այլ ձևերի կիրառումը՝ ժամկետի առումով անհնար է, պայմանով, որ նման պահանջը հնարավոր չէր օբյեկտիվորեն կանխատեսել»։

Նա սա որակեց ծիծաղելի, քանի որ յուրաքանչյուր գնում, ցանկության դեպքում կարելի է կատարել այդ հոդվածով, ինչը ռիսկային է։

Հիշատակված կարգավորումով իր նախընտրելի հաղթողի համար բարենպաստ պայմաններ ստեղծելու համար ուղղակի հայտարարվում է մրցույթ, որը հնարավոր չէ կայացնել, որից հետո անհետաձգելի գնումների կատեգորիայի տակ իր նախընտրած անձի հետ կազմակերպել գնումներ։

Պատգամավորը նկատեց, որ նման մրցույթները Հայաստանի տնտեսությունը հանգեցրել են ապրանքային շուկաների գերմոնոպոլիզացման և այդ ընթացքում 20 000 ապրանքատեսակ մոնոպոլիզացվել է։

Սերգեյ Բագրատյանը կարևորեց նաև գնումների գործընթացին տեղական արտադրողի մասնակցությունը

«Մենք փոքր շուկա ունենք, եթե թույլ տանք ազատ մրցակցության պայմաններում տեղական արտադրողին չպաշտպանել, կկորցնենք արտադրողին, որովհետև նրա համար առաջին խթանն այն է, որ իր արտադրանքը գնվի մրցույթի պայմաններում: Որևէ երկրում չեք տեսնի, որ տեղական արտադրողին չխրախուսեն, ՀՀ-ում չեն խրախուսում»,-շեշտեց պատգամավորը: