«Վերելք» ներկայացման ողջ հասույթը կփոխանցվի «Հայաստան» համահայկական հիմնադրամին
ԳՅՈՒՄՐԻ, 24 ՀՈԿՏԵՄԲԵՐԻ, ԱՐՄԵՆՊՐԵՍ: Գյումրու Վ. Աճեմյանի անվան պետական դրամատիկական թատրոնը «Վերելք» ներկայացման ողջ հասույթը կփոխանցի «Հայաստան» համահայկական հիմնադրամին:
Ինչպես տեղեկացնում է «Արմենպրես»-ը` առաջնախաղերը Գյումրիում տեղի են ունենում հոկտեմբերի 23-ին և 24-ին: Դերասան, սցենարիստ Վարդան Պետրոսյանը տասնհինգ տարի անց վերաբեմադրել է «Վերելք» ներկայացումը՝ Գյումրու պետական դրամատիկական թատրոնում այդ թատրոնի ստեղծագործական կազմի հետ:
«Երբ սկսվեց պատերազմը, որոշեցինք դադարեցնել փորձերը, բայց հետո հասկացանք, որ ոչ միայն պետք է շարունակենք, այլև պետք է անենք նաև սուժետային փոփոխություն ու պետք է անպայման խաղանք՝ ունենալով մի քանի նպատակ՝ ցույց տալ, որ այս ազգը պետք է անպայման ապրի ու ավելի հզոր լինի, իսկ մյուսը՝ հասույթը ուղղել «Հայաստան» համահայկական հիմնադրամին՝ մեր բանակին»,- լրագրողների հետ ունեցած ասուլիսում նշեց թատրոնի տնօրեն Լյուդվիգ Հարությունյանը:
«Շատ դժվար է այս պահին բեմադրել և խաղալ: Դերասաններն ու թատերախումբն ունեն արդեն զոհվածներ, ունենք զորակոչիկներ: Ամեն մի անհրաժեշտ պահի պատրաստ ենք դադարեցնել ներկայացումն ու գնալ ճակատ, բայց հիմա մենք պարտավոր ենք ամուր թիկունք լինել մեր բանակի համար՝ ամուր ֆիզիկապես եւ հոգեպես: Եվ այս դժվար ու ծանր օրերին, կատարելով մեր հայրենասիրական ու քաղաքացիական պարտքը՝ մեր բանակի հանդեպ ամուր թիկունք կանգնելու համար Գյումրու պետական թատրոնի հետ որոշեցի աշխատել նաեւ ստեղծագործական ճակատում»,-լրագրողների հետ ունեցած ասուլիսի ժամանակ նշեց Վարդան Պետրոսյանը ։
Խոսելով «Վերելք» ներկայացման բովանդակության մասին՝ հեղինակը հիշեցնում է Հայոց ցեղասպանության, Կոմիտասի հանճարի, հայ ժողովրդի տառապանքի, հերոսական անցյալի եւ այսօրվա հերոսությունների մասին:
Ներկայացումը բեմադրվել եւ առաջին անգամ խաղացվել է 2005 թվականին Երեւանի Կ. Ստանիսլավսկու անվան ռուսական դրամատիկական թատրոնի շենքում: «Վերելքը» ներկայացվելու է նաև Երևանում:
Նախագիծն իրականացվում է ՀՀ կրթության, գիտության, մշակույթի և սպորտի նախարարության աջակցությամբ:
Արմենուհի Մխոյան
Բաժանորդագրվեք մեր ալիքին Telegram-ում