Թուրքիայի ՀՆԱ-ն 2018թ.-ի չորրորդ եռամսյակում տարեկան կտրվածքով 3%-ով նվազել է, ըստ Թուրքիայի վիճակագրության ինստիտուտի տվյալների: Հաշվի առնելով, որ երրորդ եռամսյակը ավարտվել է երկրի տնտեսության ծավալի 1.6%-ով կրճատմամբ, Թուրքիան պաշտոնապես մտել է ռեցեսիայի գոտի՝ իրավիճակ, երբ երկրի տնտեսությունը երկու եռամսյակ շարունակ անկում է գրանցում: Թուրքիայում նման իրավիճակ վերջին տասնամյակում առաջին անգամ է արձանագրվում:
Թուրքական տնտեսությունը վերջին մի քանի տարիների ընթացքում կայուն աճ է գրանցել, որն ավարտվել է 2018թ.-ի կեսերին արժութային ճգնաժամի ֆոնին:
Լիրայի զգալի անկման պատճառը Անկարայի և Վաշինգթոնի միջև հարաբերությունների սրումն էր, ինչը երկու երկրների միջև առևտրային պատերազմի հանգեցրեց: Արդյունքում, թուրքական լիրան դոլարի նկատմամբ արժեզրկվել է 28%-ով, ինչն իր հերթին հանգեցրել է ներմուծվող ապրանքների գնի աճի և ինֆլյացիայի, որը հոկտեմբերին հասել է 25.2%-ի՝ դառնալով վերջին 15 տարիների ամենաբարձր ցուցանիշը: