Օրերս Հայաստանի հեռուստաընկերությունը հանրության պահանջով ցուցադրեց Տիգրան Պասկևիչյանի՝ «Հայաստանի կորսված գարունը» փաստավավերագրական ֆիլմը այդ ֆիլմի նկարահանումից յոթ տարի անց։ Ֆիլմում պատմվում է, որ բանակն ընդամենը ապահովել է քրեական հրոսակների թիկունքը։ Մարտի մեկից ամիսներ անց հայտնվում է մի փաստաթուղթ, որը հաստատում է զինվորական համազգեստի տակ թաքնված հրոսակների գոյությունը։ Իսկ հրոսակներին հավաքագրել էին այն ժամանակ Սերժ Սարգսյանի թիկնազորի պետ Վաչիկ Ղազարյանը, փոխվարչապետ Հովիկ Աբրահամյանը, օլիգարխներ Գագիկ Ծառուկյանը և Սամվել Ալեքսանյանը, պատգամավորներ Լևոն Սարգսյանը և Առաքել Մովսիսյանը, Սյունիքի մարզպետ Սուրեն Խաչատրյանը, Էրեբունի համայնքի թաղապետ Մհեր Սեդրակյանը և Կենտրոնի թաղապետ Գագիկ Բեգլարյանը։
Ֆիլմի ցուցադրությունից հետո ԲՀԿ նախագահ Գագիկ Ծառուկյանի մամլո խոսնակ, ԱԺ պատգամավոր Իվետա Տոնոյանը տարածել է հայտարարություն՝ նշելով, որ իրականության հետ ոչ մի առնչություն չունի ֆիլմի դրվագներից մեկում ցուցադրված փաստահավաք խմբի ներկայացրած փաստաթղթերից մեկը, ըստ որի՝ իբրև թե մարտի 1-ին իշխանությունների կողմից զինվորական հանդերձանք է հատկացվել նաև Գագիկ Ծառուկյանի թիկնազորին, և որն, իբրև թե, մասնակցություն է ունեցել մարտիմեկյան դեպքերին. բազմաթիվ անգամներ այդ մասին փաստել է անձամբ Գագիկ Ծառուկյանը:
«Եթե ֆիլմն իրականում փաստավավերագրական էր, ապա հեղինակները պարտավոր էին առնվազն ներկայացնել նաև երկրորդ կողմի կարծիքը, այլ ոչ թե ազգաբնակչության վճարած հարկերի հաշվին գործունեություն ծավալող Հանրային հեռուստաընկերությամբ բացարձակ ապատեղեկատվություն տարածել: Ի դեպ, օրերս նույն փաստահավաք խմբի անդամ Անդրանիկ Քոչարյանը ևս, խոսելով այդ փաստաթղթի մասին, նշել է, որ առնվազն տարօրինակ է, որ այդ ցանկում նշված մի քանի տասնյակ անուններից հատկապես առանձնացվում է Գագիկ Ծառուկյանի անունը, որը միակն է, որ խոսել է այդ փաստաթղթի մասին և շեշտել, որ որևէ առնչություն չունի այդ իրադարձությունների հետ, այն դեպքում, երբ մյուսները պարզապես լռում են…»։
Փաստաբան, Մարտի 1-ի գործով Փաստահավաք խմբի անդամ Սեդա Սաֆարյանը «Առաջին լրատվական»-ի հետ զրույցում, անդրադառնալով ֆիլմում Գագիկ Ծառուկյանի թիկնազորի հետ կապված խնդրին, նշեց, որ Փաստահավաք խմբում բազմիցս քննարկվել է հարցն այն տեսանկյունից, որ եղել են տեսանյութեր, որոնցում ակնհայտ երևացել են, որ թիկնապահներ են եղել, և այդ անձանց ինքնությունը պարզելու, նաև նրանց՝ համազգեստով այնտեղ գտնվելու որոշակի տեղեկատվության են տիրապետել այդ գործի հետ կապված:
«Այո՛, օլիգարխների թիկնապահները մասնակցել են այդ գործողություններին։ Մենք փորձեցինք ինքներս պարզել և փաստեր հավաքել, գնալ և իրային պահեստում պարզել, թե արդյոք նմանատիպ արձանագրումներ կա՞ն, ովքե՞ր են պահեստից ստացել ռազմամթերք, հագուստ, հանդերձանք, ամեն ինչ։ Փաստահավաք խմբի հինգ անդամներով եղել ենք ՊՆ իրային պահեստում, սակայն մեզ ներս չեն թողել և մեզ հնարավորություն չեն տվել այդ մատյանները զննության ենթարկելու, և այդպես էլ այդ հարցը մնաց չստացված, այդ գրությունը ո՛չ հաստատելու և ո՛չ էլ հերքելու շրջանակում, բայց քանի որ խուսափումն ակնհայտ է, որ այդ մատյանները մեզ չտրամադրվեն, ընդամենը արձանագրել ենք այդ փաստը, որ նման տեղեկություններ և փաստական հանգամանքներ և տվյալներ եղել են Փաստահավաք խմբի տրամադրության տակ։ Եվ դրանք իշխանության դիմադրության պայմաններում չեն լուսաբանվել, չեն հաստատվել, որովհետև նաև այս կապակցությամբ Փաստահավաք խմբի ղեկավարը բազմաթիվ գրություններ ուղարկեց, որ խոչընդոտ են հանդիսանում Փաստահավաք խմբի գործունեությանը, մասնավորապես՝ այդ հարցի պարզաբանման հետ կապված, և դրանից հետո ոչ միայն պատասխաններ չստացանք, ոչ միայն միջոցներ չձեռնարկվեցին իրային պահեստը բացելու և մատյաններ տրամադրելու: Այս առումով նաև կարծում եմ, որ այս բոլորը նպաստեցին Փաստահավաք խմբի ցրման համար, այսինքն՝ որևէ մեկին պետք չէր դա դարձնել հավաստի ապացույց, և դրա համար զարգացումներն այդպես ընթացան»,-հավելեց Սեդա Սաֆարյանը։
Ինչու է Գագիկ Ծառուկյանը մտահոգվում. Սեդա Սաֆարյանը հիշեցնում է, որ այդ փաստաթուղթը տպագրվել է թերթերում, 2010 թվականին այդ ցուցակը տպագրվել է, Փաստահավաք խմբի զեկույցում այդ անունները կան։
«Այն, որ փաստաթղթավորված մեզ չի հաջողվել ստանալ այդ տեղեկությունը, չի նշանակում, որ թիկնապահները չեն մասնակցել, տեսանյութեր են եղել, որտեղ երևացել են այդ թիկնապահները, և շատերը ճանաչում են նրանց։ Մենք հարցում ենք իրականացրել, մարդիկ կան, որ ասել են՝ այսինչի թիկնապահը եղել է այնտեղ. այնպես որ՝ փոքր երկիր ենք, և շատերի թիկնապահներին անձամբ են ճանաչել։ Եվ հիմա հարցն այն է, թե մասնակցության ինչ չափ, գործողությունների ինչ ծավալ են ունեցել, սա կարող է կասկածի տակ դրվել, բայց մասնակցությունը չի կարող կասկածի տակ դրվել, որովհետև նրանք եղել են»,- նշեց նա։
Հնարավո՞ր է արդյոք Մարտի 1-ի գործի շրջանակներում որևէ կարգավիճակով ընդգրկվեն Գագիկ Ծառուկյանը և այլ գործարարներ, ովքեր, ըստ լուրերի, զենք և հանդերձանք են ստացել մարտի 1-ին։ Սեդա Սաֆարյանն ընդգծեց, որ պետք է ապացույցներ հավաքվեն, միայն ցուցակը բավարար չէ։ Ցուցակը ճշտելու խնդիր ունի։ ՀՔԾ-ն, նրա խոսքով, կարող է հավաքել բոլոր տեսանյութերը, որոնք կան նաև փաստահավաք խմբում, կփնտրի և կգտնի բոլոր նրանց և այդ խորքային խնդիրը կլուծի, կպարզի՝ որքանով են նրանք մասնակից եղել։