Մենք գիտակցում ենք՝ եկել է օր ու գիշեր աշխատելու ժամանակը. Նիկոլ Փաշինյան
«Երեկ Հայաստանում տեղի ունեցած արտահերթ խորհրդարանական ընտրությունները Հայաստանում ժողովրդավարության և ժողովրդի իշխանության բացառիկ հաղթանակը դարձավ»,- ֆեյսբուքյան ուղիղ եթերում ասաց ՀՀ վարչապետի պաշտոնակատար Նիկոլ Փաշինյանը։
Նա նշեց, որ այսօր ընտրություններին հետևած միջազգային դիտորդները բացառիկ և աննախադեպ բարձր գնահատական են տվել ընտրությունների արդյունքներին, ըստ էության արձանագրելով խորհրդարանական արտահերթ ընտրությունների ազատ, արդար, թափանցիկ, ժողովրդավարական լինելու փաստը․ «Սա աննախադեպ իրադարձություն է երրորդ հանրապետության պատմության մեջ։ Ես համարում եմ, որ սա իսկապես Հայաստանի կարևորագույն նվաճումն է, Հայաստանի քաղաքացու կարևորագույն նվաճումն է»։
Նրա խոսքով, այս ընտրությունները կարևոր և բացառիկ էին ապրիլ-մայիսին տեղի ունեցած ոչ բռնի թավշյա ժողովրդական հեղափոխության արդյունքներն արձանագրելու առումով։
«Ուզում եմ շնորհակալություն հայտնել բոլոր այն քաղաքացիներին, ովքեր այս ընտրություններում կրկին վստահության քվի տվեցին «Իմ քայլը» դաշինքին։ Այդ վստահության քվեն բացառիկ պարտավորեցնող է, և մենք գիտակցում ենք, որ ահա եկել է օր ու գիշեր աշխատելու, ժողովրդի վստահությունն արդարացնելու ժամանակը։ Որևէ կասկած չկա, որ մենք ամբողջությամբ նվիրված ենք այդ առաքելությանը։
Կսկսենք նոր թափով այն բոլոր նախընտրական ծրագերի իրագործումը, որոնցով հանդես ենք եկել նախընտրական քարոզարշավի ընթացքում»,- ասաց Նիկոլ Փաշինյանը։
Նա շնորհավորեց «Բարգավաճ Հայաստան», «Լուսավոր Հայաստան» կուսակցություններին ընտրություններում իրենց արձանագրած արդյունքների համար։
««Իմ քայլը» կփորձի ներկայացնել նաև Հայաստանի այն քաղաքացիներին, որոնց նախընտրած քաղաքական ուժերը չեն հաղթահարել խորհրդարան հայտնվելու համար անհրաժեշտ արգելքը»,- ասաց վարչապետի պաշտոնակատարը։
Նա նաև նշեց. «Եկել է Հայաստանում արարման, ստեղծման, Հայաստանը ազատ և երջանիկ պետության դարձնելու, տնտեսական հեղափոխությանը նոր թափ ու ուժ տալու ժամանակը։ Համոզված ենք, որ մենք իրար հետ միասին՝ Հայաստանը, Արցախը, Սփյուռքը, հայ ժողովուրդը որպես մեկ ամբողջություն և միասնություն կհասնի այդ նպատակներին և ազգային երազանքների իրականացմանը։
Այսպիսի ընտրությունների ամենամեծ ու ամենակարևոր առաքելությունն այն է, որ ժողովրդի կամքն արտահայտվելուց հետո բոլորս լծվում ենք ժողովրդի կամքն իրագործելուն»,- ասաց Նիկոլ Փաշինյանը։
Հարակից հրապարակումներ`
Լրահոս
Տեսանյութեր
Փաշինյանի կնոջը «Նիկոլ ցեղասպան» վանկարկումով դիմավորեցին Ծիծեռնակաբերդի հուշահամալիրում