«Առաջին լրատվական»-ի զրուցակիցն է ԱԺ «Ելք» խմբակցության պատգամավոր Էդմոն Մարուքյանը:
-Պարոն Մարուքյան, ենթադրում եմ, որ Էջմիածնում տեղի ունեցած բացահայտումները մթնոլորտ են փոխել ԱԺ-ում, կա՞ր այդ տպավորությունն այսօր:
-Բոլորն այսօր ցնցված էին այդ զարհուրելի լուրից: Բոլորը շատ վատ էին ընդունել այդ լուրը, ինչը բնական է: Կարծում եմ՝ վաղը ԱԺ նիստին դա ավելի արտահայտիչ կլինի:
–Արտահայտիչ՝ քվերակությա՞ն տեսքով:
-Ե՛վ քվերակության տեսքով, և՛ կարծում եմ՝ ելույթներ կլինեն, քաղաքական գնահատականներ կտրվեն: Ես նաև հարց եմ բարձրացրել, որ միայն Մանվել Գրիգորյանով չպետք է կանգ առնել, պետք է գնալ առաջ և բացահայտումներ անել Ապրիլյան պատերազմի ժամանակ տեղի ունեցած չարաշահումների վերաբերյալ: Հայաստանում միայն Մանվել Գրիգորյանը կամ Դոն Պիպոն չեն, որ ունեն ապօրինի զենք: Բազմաթիվ զինված մարդիկ ու խմբեր կան՝ պիտի զինաթափվեն, անօրինական զենք չպետք է շրջանառվի, չպետք է լինեն բանդաներ, չպետք է լինեն օրենքից վեր կանգնած մարդիկ, բոլորը պիտի պատասխան տան: ՀՀ քաղաքացիները պետք է վստահ լինեն, որ պետական ինստիտուտները, ոստիկանությունը, ԱԱԾ-ն իրենց պաշտպանում են և ներքին անվտանգությունը ապահովված է Հայաստանում, որևէ մեկը օրենքից բարձր չէ: Սրանք ուղերձներ են, որոնք տրվել են բանավոր և կառավարության ծրագրի ներկայացման ժամանակ, հիմա այդ ուղերձները տրվում են գործողությունների տեսքով:
-Անմեղության կանխավարկածով հանդերձ՝ այս բացահայտումն ինչի՞ մասին է վկայում:
-Անմեղության կանխավարկածի շրջանակներում՝ բոլորն անմեղ են, քանի դեռ չկա ուժի մեջ մտած դատավճիռ, բայց բացահատումը խոսում է այն մասին, որ Ապրիլյան պատերազմի ժամանակ հավաքված, անգամ երեխաների կողմից հավաքված սնունդը, առաջին օգնության բժշկական նյութերը չեն հասել զինվորներին, դրանից բացի՝ Սփյուռքի կողմից հանգանակված ամենագնացները, մեքենաները, շտապօգնության մեքենան չի հասել նրանց:
–Շտապօգնության մեքենայի հանգամանքն ամենազարմանալի և շշմեցնողն է, ո՞ւմ է պետք շտապօգնության մեքենան՝ բացի իր բուն նշանակությունից:
-Գիտեք՝ ես դրա մեջ անառողջ բան եմ տեսնում, ուղղակի ապշած եմ: Այդ մեքենան բանակի համար են նվիրել, այն պետք է տրվեր որևէ զորամասի, ՊՆ որևէ ստորաբաժանման, դա որևէ մասնավոր անձի գարաժում կամ ամառանոցում պահելը խայտառակություն է: Ընդ որում՝ գիտենք, որ Ապրիլյան պատերազմի ժամանակ խոցվել են մի քանի շտապօգնության մեքենաներ, և դրա անհրաժեշտությունը եղել է, որ հանգանակվել է:
–Այսինքն՝ երբ Դուք ասում եք, որ միայն Մանվել Գրիգորյանի շուրջ տեղի ունեցածով չպետք է բավարարվել, ենթադրում եք, որ նա գործել է, յուրացրել է ոչ միայնակ, եղել են նաև ա՞յլ պատասխանատուներ, որոնք տրամադրել են այդ ամենը:
-Կարծում եմ՝ շտապօգնության կամ մյուս մեքենաները, տոննաներով սնունդը, բանակի համար նախատեսված պահածոները հեշտ չէր թաքցնելը: Արմավիրի մարզն ունեցել է ոստիկանության պետ, ԱԱԾ պետ, համապատասխան ծառայությունները չե՞ն իմացել, որ պարոն Գրիգորյանի ամառանոցում այդ եղածը պահվում է, որևէ տեղեկություն չի՞ եղել, որ զեկուցեն համապատասխան վերադաս մարմիններին, քննություն իրականացնեն: Նույնը ապօրինի զենք-զինամթերքի հետ կապված:
-Զենք-զինամթերքի առումով արդարացնողներ կան, ասում են՝ գեներալն ինչո՞ւ չպետք է ուենան զենք-զինամթերք:
-Գեներալն ունի տասնյակ զենքեր՝ օրինական, որոնք նա ստացել է պատերազմին մասնակցելու հանգամանքով: Խոսքն այն զինատեսակների մասին է, որոնք չեն կարող լինել օրինական, չեն կարող նվիրել, դրանք ապօրինի են, և զենքի առումով էլ շատ լուրջ բացասական արձագանք կա: Մեր հասարակության մեջ երեխաների՝ զինվորներին հասցեագրված նամակներն այդտեղ պահելը, բնականաբար, ավելի լուրջ մտահոգություն է առաջացնում, քան զենք ունենալը, բայց երկու մասով էլ խնդիր կա: Կրկնում եմ՝ չպիտի լինեն զինված խմբեր, պետությունից վեր կանգնած մարմիններ, ստորաբաժանումներ, որոնք պետական չեն, և որևէ ՀԿ կամ անձ չի կարող պետական ֆունկցիաներ իրականացնել, դրանով նսեմացնելով պետության դերը:
-Զինված խմբեր չպետք է լինեն, դա պարզ ու հասկանալի է, իսկ այդպիսի ճոխությամբ ապրող գեներալներ պե՞տք է լինեն:
-Բնավ՝ ոչ: Պետք է պատասխան տան, թե որտեղից են տրցակով սեփականության վկայականները, այսինքն՝ ինչ մեթոդաբանություն է գործում, ինչ ճանապարհով է մարդն այդպես հարստանում:
-Որի մասին նո՞ր են իմանում:
-Գրիգորյանը եղել է ՊՆ փոխնախարար, հետո ԱԺ պատգամավոր. երկու կարգավիճակներն էլ անհամատեղելի են այդպիսի հարստության հետ: ՊՆ փոխնախարարի կամ ԱԺ պատգամավորի աշխատավարձով մարդը չի կարող մի քանի կիլոգրամ կշիռ ունեցող սեփականության վկայականներ, հեկտարներով շենք-շինություններ ունենալ:
–Դուք մոռացաք ԵԿՄ նախագահ լինելու հանգամանքը:
-Այդ պաշտոնը բիզնես գործառույթներ չի ենթադրում և հարստացման որևէ լծակ, որպես ՀԿ ղեկավար, նա չունի:
-Բայց օգնությունները հայտնվել են հենց այդ օղակով:
-Օգնությունները տրվել են, որ հաշմանդամ, աղքատության ծանր պայմաններում ապրող ազատամարտիկներին հասցեագրվեն, հազարավոր ազատամարտիկներ այսօր հացի խնդիր ունեն:
-Լավ, այդքան միամի՞տ են եղել, անգամ երեխաների նամակները չեն վերացրել:
-Չեմ կարող ասել, կարելի է սպասել պաշտոնական պարզաբանումներին, բայց կարծում եմ՝ որևէ պարզաբանում այլևս չի կարող ջնջել հասարակության կողմից այն անհանդուրժողական վերաբերմունքը, որ կա այս երևույթի նկատմամբ:
Մանրամասն՝ տեսանյութում: