ՀՀ վարչապետի թեկնածու Նիկոլ Փաշինյանն այսօր հանդիպումներ է ունեցել Հայաստանում Ռուսաստանի, ԱՄՆ-ի, Վրաստանի և ԵՄ դեսպանների հետ: Այս մասին Փաշինյանը գրառում է կատարել իր ֆեյսբուքյան էջում. «Այսօր հանդիպումներ ունեցա Հայաստանում ՌԴ արտակարգ և լիազոր դեսպան Իվան Վոլինկինի, Հայաստանում ԱՄՆ արտակարգ և լիազոր դեսպան Ռիչարդ Միլսի, Հայաստանում Եվրամիության դեսպան Պյոտր Սվիտալսկիի, Հայաստանում Վրաստանի արտակարգ և լիազոր դեսպան Գիորգի Սագանելիձեի հետ»։
Սխալված չենք լինի, եթե արձանագրենք, որ այս հանդիպումները Փաշինյանի այսօրվա հագեցած օրակարգի ամենակարևոր հատվածն են:
Հայաստանի հետ առնչվող բոլոր աշխարհաքաղաքական կենտրոններն, ըստ էության, ճանաչեցին Նիկոլ Փաշինյանի ապագա իշխանությունը: Երրորդ հանրապետության պատմության մեջ` Լևոն Տեր-Պետրոսյանի առաջին նախագահությունից հետո, իշխանությունները երբեք չեն ունեցել քաղաքական լեգիտիմության նման պաշար և պատահական չէ, որ Հայաստանի նոր կառավարության ճանաչման հարցում առկա է միջազգային լիակատար կոնսենսուս: Այս առումով մեր թավշյա հեղափոխությունը շահեկանորեն տարբերվում է վրացական «Վարդերի հեղափոխությունից» կամ ուկրաինական Մայդաններից:
Որպես կանոն, օտարերկրյա դեսպանները գերադասում են պետության առաջին դեմքերին հանդիպել պոստֆակտում, երբ արդեն կայացած է լինում նրանց նախագահությունը կամ վարչապետությունը: Փաշինյանը դեսպաններին հանդիպեց վարչապետական քվեարկությունից հինգ օր առաջ:
Այս փաստն ինքնին հուշում է, որ Վաշինգտոնում, Բրյուսելում և Մոսկվայում արդեն ընդունում են այն իրողությունը, որ Հայաստանում իշխանափոխությունը կայացած փաստ է: Մյուս կողմից` սա միջազգային ակնածանքի դրսևորում է Հայաստանում տեղի ունեցած թավշյա հեղափոխության հանդեպ: Այս քաղաքական ֆենոմենի շնորհիվ աշխարհում շեշտակի բարձրացել է Հայաստանի միջազգային հեղինակությունը, ինչն անպայմանորեն նոր, ավելի բարձր նշաձող է ենթադրում Հայաստանի արտաքին քաղաքականության համար, նաև ու առաջին հերթին` ԼՂ խնդրում:
Եվ վերջապես` Նիկոլ Փաշինյանի և դեսպանների հանդիպումը շատ էական է նաև ներքաղաքական համատեքստում: Հայաստանի փլուզվող քրեաօլիգարխիկ համակարգն արդեն ի վիճակի չէ կայացնել միասնական որոշումներ: Սա` մի կողմից, իշխանափոխությունը դարձնում է անշրջելի, մյուս կողմից` համակարգի տարբեր սեգմենտների գործողությունները դառնում են անվերահսկելի, ինչը որոշակի ռիսկեր է ծնում: Նիկոլ Փաշինյանի դեռ չձևավորված իշխանության միջազգային կոնսոլիդացված ճանաչումը գործնականում ի դերև է անում ռևանշի որևէ հնարավորություն` առնվազն մինչև մայիսի 8-ի ընտրությունները:
Լուսանկարը՝ Photolure-ի
