ՌԴ իշխանությունները համաձայնել են ԱԺ նախկին պատգամավոր, «Ալրաղացի Լյովիկ» անունով հայտնի Լևոն Սարգսյանին արտահանձնել Հայաստանին: Այս մասին հայտնել է Գլխավոր դատախազի խորհրդական Գոռ Աբրահամյանը՝ նշելով, որ Ռուսաստանի Դաշնության գլխավոր դատախազության կողմից որոշում է կայացվել բավարարել հետախուզվող Լևոն Սարգսյանին քրեական հետապնդման ենթարկելու նպատակով Հայաստանի Հանրապետության իրավապահ մարմիններին հանձնելու մասին ՀՀ գլխավոր դատախազության միջնորդությունը: Աբրահամյանի փոխանցմամբ՝ Ռուսաստանի Դաշնության իրավասու մարմիններին հանձնարարվել է իրականացնել Սարգսյանի փոխանցումը Հայաստանի Հանրապետության իրավասու մարմիններին՝ հանձնելու մասին որոշումն օրինական ուժի մեջ մտնելուց հետո: «Այս կապակցությամբ ՀՀ գլխավոր դատախազությունը ՀՀ ոստիկանությանը հանձնարարել է կազմակերպել Լևոն Սարգսյանի տեղափոխումը»,- գրել է նա:
Ուշագրավ է, սակայն, որ ընդամենը մի քանի օր առաջ նույն Ռուսաստանի Դաշնությունը ձերբակալեց, ապա ազատ արձակեց Մարտի 1-ի գործով անցնող առանցքային մեղադրյալ Վահագն Հարությունյանին, և բանը անգամ արտահանձնմանը չհասավ։ Եվ խոսքը միայն նրա մասին չէ։ Այս պահին Ռուսաստանում «ապաստանում» են Մարտի 1-ի գործով մի քանի առանցքային մեղադրյալներ։
Քաղաքագետ Ռուբեն Մեհրաբյանը ամբողջությամբ կիսում է Մարտի 1-ի գործով տուժողների իրավահաջորդների ներկայացուցիչ, փաստաբան Սեդա Սաֆարյանի գնահատականը, որ Ռուսաստանը պետականորեն խոչընդոտում է Հայաստանում Մարտի 1-ի գործի դատաքննությանը: «Պետք է ընդգծել, որ, այո, Ռուսաստանը դա անում է պետականորեն։ Ռուսաստանը վերածվել է ամենածանր հանցագործությունների մեջ մեղադրվողների և արդարադատությունից փախչողների ապաստանի և քաղաքական տանիքի։ Սա պետք է արձանագրել և մեր հետագա քայլերը պլանավորել ըստ այդմ»,- «Առաջին լրատվական»-ի հետ զրույցում ասաց Մեհրաբյանը՝ հավելելով, որ Ռուսաստանին ձեռնտու չէ, որ Հայաստանում հաղթանակի արդարադատությունը, որովհետև Ռուսաստանը շահագրգռված չէ, որ Հայաստանը իր այս այս ներքին փոփոխությունների ճանապարհին հաջողի, քանի որ դա կարող է «վատ օրինակ» ծառայել Ռուսաստանի հասարակության համար, որն ուղղակի Պուտինի պարանոցից բռնելու է և պատասխան պահանջի իրավաբանական բեսպրեդելի համար, որով նա այսօր զբաղվում է Ռուսաստանում՝ թքած ունենալով իր ազգաբնակչության արժանապատվության և բանականության վրա։
Ինչ վերաբերում է հատկապես Մարտի 1-ի գործով մեղադրյալներին իր թևի տակ պահելու Ռուսաստանի քայլին, Մեհրաբյանը նկատեց, որ դրա պատճառն այն է, որ Մարտի 1-ի գործով բոլոր այդ մեղադրյալները նրանք են, ովքեր եղել են ռուսական քաղաքականության հաղորդիչները Հայաստանում, բոլոր նրանք, ովքեր Հայաստանում արմատավորել էին ռուսական բեսպրեդելը։
Իրավապաշտպան Արթուր Սաքունցը ևս համոզված է, որ հատկապես Մարտի 1-ի հանցագործության հետ կապված անձանց մասով ՌԴ իշխանությունները շատ ավելի հետամուտ են գործով ներգրավված մեղադրյալներին հովանավորելու և քրեական արդարադատությունից նրանց զերծ պահելու առումով։ Ինչ վերաբերում է պատճառներին, ապա իրավապաշտպանը վերջերս մեզ հետ զրույցում նշել էր, որ իր սուբյեկտիվ կարծիքով, որը հիմնված է որոշ օբյեկտիվ տվյալների վրա, Մարտի 1-ի գործողությունները սկսվել են Ռոբերտ Քոչարյանի՝ Մոսկվա այցելությունից հետո։ «Կրեմլն ամենայն հավանականությամբ մասնակցություն ունի ՀՀ քաղաքացու դեմ պետական ահաբեկչության գործում։ Իմ կարծիքով՝ հենց դրանով է պայմանավորված Ռուսաստանի ներկայիս գործելակերպը։ Իրենք չեն ցանկանում, որ քրեական գործը բազմակողմանի, լրիվ և օբյեկտիվ բացահայտվի։ Իրենք ստիպված են լինելու որոշ հարցերի պատասխաններ տալ, որոնք ի հայտ են գալու Մարտի 1-ի գործի քննության ընթացքում»,- ասել էր նա։
Հիշեցնենք՝ Լևոն Սարգսյանը հետախուզման մեջ էր 2018 թվականի հոկտեմբերի 1-ից: Նա որպես մեղադրյալ է ներգրավվել 11 տարի առաջ ՀՀ մաքսային պետական կոմիտեի նախկին պետ Արմեն Ավետիսյանի առանձնատան վրա կատարված ավազակային հարձակումը պատվիրելու համար՝ ՀՀ քրեական օրենսգրքի 175-րդ հոդվածի 3-րդ մասի 1-2-րդ կետերի (կազմակերպված խմբի կազմում առանձնապես խոշոր չափերով գույք հափշտակելու նպատակով, ավազակություն) և 223-րդ հոդվածի 2-րդ մասի (հանցավոր համագործակցությանը մասնակցելը) հատկանիշներով: Սարգսյանը հայտնաբերվել և ձերբակալվել էր նոյեմբերի 21-ին ՌԴ Մոսկվայի մարզի Զելենոգրադ քաղաքում: Նոյեմբերի 25-ին ՀՀ և ՌԴ դատախազությունների գործակցության արդյունքում ՌԴ դատարանը բավարարել էր արտահանձնելու հարցը քննարկելու շրջանակներում նրան կալանավորելու՝ ՌԴ դատախազության միջնորդությունը: