Հայաստանի պատմական քարտեզները ցուցադրվում են Լատվիայի ազգային գրադարանում
«Այս 51 քարտեզները ցույց են տալիս, թե ինչպես է Հայաստանն ընկալվել օտարերկրացիների կողմից 26 դար շարունակ: Դրանք արտացոլում են մեր պատմության փառահեղ, ինչպես նաև ողբերգական էջերը»: Այս մասին հայտարարել է Լատվիայում ՀՀ դեսպան Տիգրան Մկրտչյանը՝ ելույթ ունենալով Լատվիայի ազգային գրադարանում Հայաստանի պատմական քարտեզների ցուցահանդեսի բացման պաշտոնական արարողության ժամանակ:
Դեսպանը տեղեկացրել է նաև, որ այդ ցուցահանդեսը, որտեղ Հայաստանը ներկայացված է հին հունական, հռոմեական, պարթևական, արաբական, օսմանյան, եվրոպական քարտեզագիրների կողմից, դրական արձագանք է ստացել մի շարք այլ մայրաքաղաքներում:
ԱԳՆ մամուլի և տեղեկատվության վարչության փոխանցմամբ, միջոցառման բացմանը ներկա են եղել Լատվիայում հավատարմագրված դեսպաններ, Լատվիայի սահմանադրական դատարանի նախագահը, պատգամավորներ, գործադիր իշխանության ներկայացուցիչներ, մտավորականներ, հոգևորականներ, լրագրողներ և հայ համայնքի ներկայացուցիչներ:
Լատվիայի ազգային գրադարանի տնօրեն Անդրիս Վիլկսը նշել է, որ մեծ կարևորություն է տալիս Ռիգայում նման միջոցառման անցկացմանը, քանի որ լատվիական հասարակությունը բացառիկ հնարավորություն է ստանում օտար քարտեզագրական աղբյուրների միջոցով ծանոթանալու հայ ժողովրդի պատմությանը: Ազգային գրադարանի տնօրենը նաև շեշտեց, որ մեծապես կարևորում է Լատվիայի ազգային գրադարանի համագործակցության խորացումը Մատենադարանի և Հայաստանի ազգային գրադարանի հետ:
Ցուցահանդեսին դասախոսությամբ հանդես է եկել քարտեզները կազմող և հրատարակող Ռուբեն Գալիչյանը, ով ներկայացրել է պարսից Դարեհ Մեծն արքայի Բեհիսթունյան սեպագիր արձանագրությունները, ուր Հայաստանը, որպես հարևան երկիր նշվում է բազմիցս, ապա՝ մ.թ.ա վեցերորդ դարի, Բրիտանական թանգարանում պահվող հնագույն Աշխարհացույցը, որի կենտրոնում առկա են երեք երկիր՝ Ասորեստանը, Բաբելոնը և Հայաստանը, պատմագիտության հիմնադիր Հերոդոտոսի, աշխարհագրության հիմնադիր Ստրաբոնի և այլ հնագույն աշխարհագրագետների քարտեզներ, որոնց բոլորում առկա է Հայաստանը: Հերթականությամբ ցուցադրվել են միջնադարյան, իսլամական և քրիստոնեական քարտեզներ:
Այնուհետև Օսմանյան Թուրքիայում 1894-96թթ. կոտորածների և 1915թ. Ցեղասպանությանը վերաբերող քարտեզներն էին՝ հասնելով մինչև Հայաստանի Առաջին հանրապետության, ինչպես նաև խորհրդայնացման քարտեզները: Քարտեզների այս շարքն ավարտվում էր Հայաստանի և Արցախի ներկա քարտեզներով:
Ցուցահանդեսը, որն անց է կացվում Սիլտում-էլեկտրոպրոյեկտ ընկերության (հայ բարերար Մխիթար Մխիթարյանի) աջակցությամբ, բաց է լինելու մինչև նոյեմբերի 26-ը: