Սանկտ Պետերբուրգի «Սուբբոտա» թատրոնի «Ոչնչից մեծ աղմուկ» ներկայացմամբ եզրափակվեց Շեքսպիրյան փառատոնը
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: «Ոչնչից մեծ աղմուկ» ներկայացմամբ ավարտվեց Երևանի Շեքսպիրյան 13-րդ միջազգային թատերական փառատոնը: «Արմենպրես»-ի հաղորդմամբ՝ բեմադրությունը ցուցադրվեց նոյեմբերի 5-ին Կ.Ստանիսլավսկու անվան ռուսական պետական դրամատիկական թատրոնում:
«Առաջին անգամ ենք այս ներկայացմամբ մասնակցում թատերական փառատոնի և շատ հուզվում ենք, թե ինչպիսին կլինի ընթացքը։ Այսօր մեկ փորձ ենք ունեցել ռուսական թատրոնի բեմում։ Ամեն բան տեղայնացրել ենք՝ հարմարավետ զգալու համար։ Կարծում եմ՝ոչինչ չի խանգարի մեզ»,-ասաց «Սուբբոտա» թատրոնի տնօրեն Անդրեյ Լոբանովը։
Նրա խոսքով՝ ներկայացումը Ռուսաստանում մեծ հաջողություն ունի և միշտ անցնում է լեփ-լեցուն դահլիճներում։ «Այն հատկապես դուր է գալիս երիտասարդ սերնդին, և դա պատահական չէ․ երիտասարդական թիմ է աշխատել ներկայացման ստեղծման վրա՝ բեմադրիչ Գալինա Ժդանովայի գլխավորությամբ։ Ավագ սերնդի ներկայացուցիչներն էլ, ովքեր սովոր են ավելի շատ դասական լուծումներ տեսնել բեմում, ոգևորությամբ են հետևում այն ամենին, ինչ կատարվում է ներկայացման ընթացքում։ Հույս ունեմ, որ հայ թատերասերներին էլ այն դուր կգա»,-նշեց տնօրենը:
Շեքսպիրյան 13-րդ միջազգային թատերական փառատոնն այս տարի հյուրընկալել էր 5 երկրից ժամանած ավելի քան 90 մասնակցի և հյուրերի` հեղինակավոր արվեստագետների, արտմենեջերների, միջազգային փառատոնի նախագահների ԱՄՆ-ից, Մակեդոնիայից, Իտալիայից, Սանկտ Պետերբուրգից և այլ երկրներից:
Երևանյան 5 բեմահարթակում ցուցադրվեց 10 ներկայացում և 1 ներկայացում՝ Գյումրու Վ. Աճեմյանի ավան պետական դրամատիկական թատրոնում:
Թատերասերները հնարավորություն ունեցան դիտել դրամատիկական, երաժշտական, մուլտիմեդիոն ներկայացումներ:
Փառատոնի նշանավոր ներկայացումներից էին Բիտոլայի ազգային ակադեմիական թատրոնի՝ «Անտոնիո և Կլեոպատրա», «Օթելլո», ԱՄՆ-ի «Լիթ Մուն» թատերական ընկերության՝ «Հուլիոս Կեսար», «Ռիչարդ 3-րդ» և Սանկտ Պետերբուրգի «Սուբբոտա» թատրոնի՝ «Ոչնչից մեծ աղմուկ» ներկայացումները:
Երևանյան թատրոններից Երևանի Շեքսպիրյան 13-րդ միջազգային թատերական փառատոնի ծրագրում հանդես եկան Հ. Պարոնյանի անվան երաժշտական կոմեդիայի պետական թատրոնը, Երևանի պետական Կամերային թատրոնը և Ուսանողական թատրոնը:
Երևանի Շեքսպիրյան միջազգային թատերական փառատոնն առաջին անգամ Երևանում անցկացվել 2005 թվականին: Փառատոնի հիմնադիրն է Հայաստանի թատերական գործիչների միության նախագահ Հակոբ Ղազանչյանը:
2016 թվականից փառատոնի տնօրենը դերասան, բեմադրիչ Կարո Բալյանն է:
Բաժանորդագրվեք մեր ալիքին Telegram-ում