«Ուրարտուն» ուժեղանալու է. եվրագավաթներին մասնակցելու նպատակ ունի

«Ուրարտու»-ՖԻՄԱ 88:68

«Ուրարտու» բասկետբոլային թիմը հաջորդ մրցաշրջանում եվրագավաթային հանդիպումներին մասնակցելու մեծ ցանկություն ունի: Ավելի վաղ նորաստեղծ Ա լիգայի տնօրեն, Հայաստանի բասկետբոլի ֆեդերացիայի փոխնախագահ Արա Պողոսյանը, որը նաեւ թիմի հիմնադիրներից է, նշում էր, որ 1-ին մրցաշրջանից հետո հայկական թիմերը գուցե այդքան ուժեղ չլինեն, որ կարողանան միջազգային խաղեր անցկացնել, սակայն «Ուրարտուն» արդեն այսօրվանից քայլեր է ձեռնարկում, որ որքան հնարավոր է շուտ նորամուտը նշի միջազգային ասպարեզում: Ակումբի նախագահ, մարզական մեկնաբան Կարեն Գիլոյանն armtimes.com-ի հետ զրույցում խոսեց թիմի ներկայի ու նպատակների մասին:

«Մեր նպատակը եվրագավաթներին մասնակցելն է, զարգանալը: Չենք պատրաստվում միայն Հայաստանի առաջնությունում խաղալ ու վերջ: Ռեալ կգնահատենք թիմի հնարավորությունները: Եթե պատրաստ լինենք խաղալ հավասարը հավասարի նման, ապա անպայման կմասնակցենք, եթե ո՛չ, կսպասենք, կուժեղանանք նոր կմասնակցենք»,- ասաց նա:

Մինչեւ այդ «Ուրարտուն» փորձելու է հաղթել Հայաստանի առաջնությունում: Այդ նպատակով ղեկավարությունը մեծ ջանքեր է գործադրում թիմը լավ մարզիկներով հանալրելու համար: Նախորդ տարվա «Ուրարտուից», որը հանդես էր գալիս Ռուսաստանի «Սուպերլիգա 1»-ում, թիմում մնացել են մի քանի խաղացողներ: Նրանց միացել են երիտասարդներ, ու դեռ բանակցություններ են տարվում այլ բասկետբոլիստների հետ:   

«Միայն չեմպիոն դառնալու համար ենք խաղալու, եւ կրկնում եմ՝ ամեն ինչ անելու ենք, որպեսզի մյուս մրցաշրջանի սկզբում ուժեղ թիմ լինենք, որը կկարողանա Հայաստանը ներկայացնել եվրագավաթներում: Նախորդ «Ուրարտուից» վերցրել ենք Նիկիտա Զախարովին, Էդգար Բաբայանին, Կարեն Հայրապետյանին: Ունենք խաղացող Հայաստանի վետերաններից՝ Թովմաս Հորդանյանը: Մեզ մոտ է ՀՀ հավաքականի անդամ Միքայել Պողոսյանը: Կան երիտասարդ խաղացողներ, որոնք խաղում են ՀՀ պատանեկան ու երիտասարդական հավաքականներում: Հունաստանի հյուպատոսի տղան էլ է մեզ մոտ: Շատ ուժեղ չէ, սակայն մարզված է: Պահեստային է, բայց պարբերաբար կտեսնենք խաղահրապարակում»,- ասաց Գիլոյանը:

«Ուրարտուում» գիտեն, որ իրենց համառ պայքար է սպասվում: Մրցակիցները նույնպես գործում են: Մասնավորապես՝«Արցախն» ու «Շիրակը» եւս լուրջ աշխատանքներ են տանում համալրվելու ուղղությամբ, ներգրավում են նաեւ լեգեոներների: Սա «Ուրարտուին» միայն ուրախացնում է: Թիմում չեն ուզում հեշտ հաղթանակներով ու անշուք պայքարում նվաճումներ ունենալ:

«Ուզում ենք, որ երկրպագուն գա ու պայքար տեսնեի, մենք էլ այդ պայքարում հաղթենք ու ուրախանանք: Մրցակիցներն ուժեղանում է, շատ լավ է, դա կօգնի նաեւ մեզ զարգանալ, չբավարարվել եղածով»,- ասաց Գիլոյանը:

Ցանկանում են նաեւ, որ հաղթելու ճանապարհին իրենց աջակցեն երկրպագուները: Առաջին խաղում նրանց տնային դահլիճում՝ «Օլիմպավանում», ՖԻՄԱ-ի հետ դիմակայությունը դիտում էր մի քանի տասնյակ մարզասեր: Ակումբի նախագահը հույս ունի, որ նրանց թիվն աստիճանաբար կավելանա: Իրենք փորձում են նպաստել դրան:

«Ֆան ակումբ ենք ստեղծել, որի անդամները կունենան դրոշներ, խորհրդանիշներ, լոգոներ, որոնցով կգան ու կերկրպագեն: Նրանք բասկետբոլի երկրպագուներ են, մեր ընկերները, մեր հարազատները, մարդիկ, որոնք հավատում են մեր նպատակներին, ծրագրերին, մարդիկ, որոնք սիրում են բասկետբոլը, ուզում են մեզ հետ միասին տոնել «Ուրարտուի» հաջողությունները»,- ասաց նա՝ ավելացնելով, որ, եթե երկրպագուները շատանան, ապագայում գուցե մտածեն նաեւ ավելի մեծ դահլիճ տեղափոխվելու մասին:

Մինչեւ մրցաշրջանի սկիզբն «Ուրարտու»-ի հիմնադիրներն ու ղեկավարները ցանկանում էին, որ այն ներկայացներ Վանաձոր քաղաքը եւ խաղար Ստեփան Սարգսյանի անվան համալիր մարզադպրոցի դահլիճում: Նպատակը չիրականացավ: Գիլոյանը բացատրեց պատճառները: Նշեց, որ մարզի ղեկավարներին հետաքրքիր չի եղել իրենց առաջարկը:

«Մարզի ղեկավարների հետ զրուցեցինք: Ոչ թե համաձայնության չեկանք, այլ հասկացանք, որ գուցե առայժմ շուտ է նման բաներ առաջարկել: Նրանք առանձնապես ոգեւորված չէին: Մեծ բան էլ չէինք ուզում: Ուզում էինք՝ դահլիճ լիներ, ու մեկ էլ տարրական ծախսերի մասին էր խոսքը: Գուցե հետագայում կարողանանք կրկին բանակցել, ու գանք համաձայնության, կամ գուցե կլինեն մարդիկ, որոնք կուզեն իրենց մարզերում հիմնել թիմեր»,- ասաց նա:

Այս «Ուրարտուն» անցած տարի հիմնել էին Արա Պողոսյանը եւ նրա ընկերը՝ Սուրեն Զոհրաբյանը: Կոչել էին այն թիմի անունով, որը գործում էր 90-ականների սկզբին, եւ որի խաղացող էր նաեւ Պողոսյանը: Անցած տարի գլխավոր մարզչի պարտականությունները կատարում էր Տիգրան Գյոկչյանը, որը նաեւ ՀՀ հավաքականն էր գլխավորում: Ռուսաստանի «Սուպեր լիգա 1»-ում թիմն 9 հանդիպում անցկացրեց եւ բոլոր խաղերում էլ պարտվեց: Մրցելույթները դադարեցրեց ֆինանսական խնդիրների պատճառով: Ա լիգայի 1-ին տուրում Սարգիս Ստեփանյանի գլխավորությամբ ՖԻՄԱ-ին հաղթեց 88:68 հաշվով:

Լուսանկարը՝ Հակոբ Բերբերյանի