«Ռոբերտ Քոչարյանը իրեն դիրքավորեց որպես քաղաքական ընդդիմախոս և բաց տեքստով քաղաքական հայտ ներկայացրեց»,- «Առաջին լրատվական»-ի հետ զրույցում ասաց քաղաքական մեկնաբան Արմեն Բաղդասարյանը՝ պատասխանելով Ռոբերտ Քոչարյանի՝ քաղաքականություն վերադառնալու հնարավորությանն առնչվող հարցին:
Նա նշեց՝ հասարակության վրդովմունքը հասկանալի էր. «Ժողովրդի ասելիքն այն էր, որ Ռոբերտ Քոչարյանը կարող է խոսել միայն դատարանում և միայն մեղադրյալի կարգավիճակով. որևէ այլ խոսելու բան նա չունի»:
Մեր զրուցակցի կարծիքով՝ Ռոբերտ Քոչարյանի ազատ արձակումը նշանակում է, որ նոր իշխանությունները պետք է թոթափեն հեղափոխական էյֆորիան և ավելի լրջորեն մոտենան իրենց անելիքին. «Իրավական հարթությունում հարցերը պետք է լուծել ոչ թե դուխով, այլ խելքով: Քոչարյանի ազատ արձակման մեղավորը ՀՔԾ-ն է, որը չէր կանխատեսել այդպիսի ելք և նրան այնպիսի մեղադրանք էր առաջադրել, որ դատարանը կարողացավ նման որոշում կայացնել»:
Քաղաքական մեկնաբանի խոսքով՝ Քոչարյանի ազատ արձակումը նրա հաղթանակն էր՝ որպես մեղադրյալ. «Ուրիշ բան, որ նա որպես քաղաքական գործիչ, քաղաքական հայտ ներկայացնող լուրջ պարտություն կրեց»:
Հարցազրույցն ամբողջությամբ՝ տեսանյութում: