Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ շարունակվեց Նորք-Մարաշի զինված խմբի գործով դատական քննությունը՝ ըստ մեղադրանքի՝ «ՀՀ իշխանությունը յուրացնելու, զավթելու նպատակով ստեղծված հանցավոր համագործակցության» 20 անդամների՝ Արթուր Վարդանյանի,Վահան Շիրխանյանի, Անտոն Դիկրան Թոթոնջյանի, Գառնիկ Մարգարյանի, Վլադիմիր Առաքելյանի, Խաչիկ Ավետիսյանի, Ավետիս Բարեյանի, Վաղինակ Ստեփանյանի, Արթուր Եղիազարյանի, Վահագն Սալնազարյանի, Արման Հայրապետյանի, Էդվարդ Ներսիսյանի, Հարություն Սարիբեկյանի, Արա Պողոսյանի, Տիգրան Բոյաջյանի, Գևորգ Ջնդոյանի, Արկադի Մարդոյանի, Ասյա Մկրտչյանի, Մարինե Կաթանյանի, Նելլի Մինասյանի վերաբերյալ:
Մեղադրող Գևորգ Սարգսյանը շարունակեց հրապարակել քրեական գործում առկա փաստաթղթերն ու գրավոր ապացույցները:
Այս դատական նիստին հրապարակվեցին 11-12-րդ հատորների փաստաթղթերը:
Փաստաբան Ինեսա Պետրոսյանը հրապարակեց իր պաշտպանյալ Նելլի Մինասյանի վերաբերյալ փաստաթղթեր:
Ըստ Սյունիքի մարզի Հարթաշեն համայնքի 70 բնակիչների՝ Նելլիին ճանաչում են նրա ծննդյան օրից: Նա «մեծացել է հարգված ընտանիքում… մարդասեր է, մարդամոտ, կրթված ու բանիմաց, ինչպես նաև՝ հայրենասեր ու նրբանկատ: Գյուղի բնակիչներից յուրաքանչյուրի կողքին կանգնում, օգնում է…»:
Համայնքի ղեկավարությունը Նելլիի բնութագրում առանձնացրել էր նրա «քաղաքակիրթ վարվեցողությունը», այն, որ ակտիվ է, հայրենասեր ու բարյացակամ…
Խմբի վնասազերծման պահի՝ 2015 թվականի նոյեմբերի դրությամբ Նելլի Մինասյանը սովորում էր «Գլաձոր» համալսարանի իրավագիտության ֆակուլտետի 4-րդ կուրսում: Ըստ համալսարանից տրված բնութագրի՝ Նելլին ակտիվ մասնակցել էր ուսանողական գիտական գործունեությանը, նրա աշխատությունները՝ մշակույթում հանճարի դերի, ինչպես նաև էֆտանազիայի վերաբերյալ համալսարանում գրավել էին առաջին տեղը: Համալսարանից Նելլիի ստացած պատվոգրերը կցված են քրեական գործին:
Ավելացնենք, որ Նելլին ներկայումս հղի է, նա կալանքի տակ չգտնվող ամբաստանյալներից է, նրա բալիկը կծնվի հունվար ամսվա ընթացքում:
Մեղադրող Սարգսյանի ընթերցանության ընթացքում՝ երբ գործում առկա փաստաթղթերի «վերնագրերն» էին միայն ընթերցվում, օրինակ՝ «Վերաքննիչ դատարանի որոշում», «Ուղեկցական գրություն» և այլն, հայտարարությամբ հանդես եկավ Վահան Շիրխանյանի շահերի պաշտպան, փաստաբան Հայկ Ալումյանը: Նա հռետորական հարց հնչեցրեց. «Ի՞նչ գործ ենք կատարում, հրապարակվում են փաստաթղթե՞րը, թե՞ դրանց ցանկը: Եթե միայն վերնագրերն են հրապարակվում՝ այդպիսի փուլ օրենքով նախատեսված չէ… Ես առարկում եմ միայն վերնագրերի հրապարակման դեմ… Կողմնորոշվենք…»:
Մեղադրող Սարգսյանը հիշեցրեց, որ փաստաբանները նախորդ նիստերում էլ դժգոհում էին ապացույցների՝ մանրամասն հրապարակումից: Մեղադրողը նշեց, որ օրենքում նշված չէ՝ փաստաթղթերի հրապարակումը ինչպես պիտի լինի՝ առաջին տառից մինչև վերջին տա՞ռը: Եթե պաշտպանները ցանկանում են, որ ինչ-որ փաստաթուղթ ավելի մանրամասն հրապարակվի, թող իրենք դա անեն՝ խնդիր չկա…
Սակայն այս վեճը սրանով չեզրափակվեց: Հայկ Ալումյանը հայտարարեց. «Միայն վերնագրերի հրապարակման դեպքում փաստաթղթերը հրապարակված համարվել չեն կարող… Կոչ եմ անում դատավարությունը աբսուրդի չվերածել»:
Նույնիսկ վեճ գնաց, թե ո՞վ պետք է հրապարակի փաստաթղթերը: Ավելի տրամաբանականն այն է, որ մրցակցային դատավարության ընթացքում կողմերից յուրաքանչյուրը հրապարակի իրեն անհրաժեշտ փաստաթղթերը՝ առաջարկեց փաստաբան Գիվի Հովհաննիսյանը: Բայց քանի որ ընդհանուր հայտարարը չէր գտնվում, մեղադրողը նույնիսկ ասաց. «Թող հենց դատարանն էլ հրապարակի», իսկ Հայկ Ալումյանը կես-կատակ առաջարկեց. «Հրապարակման մասնագետ հրավիրեք, թող հրապարակի»:
Մեղադրողը դժգոհեց, որ պաշտպանները ցանկացած պարագայում մեղադրանքի կողմի հակառակ դիրքորոշումն են արտահայտում՝ փաստաթղթերը մանրամասն է հրապարակում, ասում են՝ ո՞ւմ է պետք, հակիրճ է հրապարակում, ասում են՝ այդպես հրապարակված համարվել չեն կարող…
Հայկ Ալումյանը եզրափակեց իր բացած խոսակցությունը. «Ակնարկներ են անում, թե մենք ենք ձգձգում դատավարությունը, ոմանք կարծում են, որ դատարանից ազատ են արձակվելու… Բայց մենք չենք ձգձգում, ուղղակի գործողությունները, որ կատարվում են, պիտի պատշաճ կատարվեն՝ նույնիսկ եթե ժամանակ են խլում»:
Մեղադրողը հաջորդող փաստաթղթերը՝ դատարանի որոշումներ հեռախոսային գաղտնալսումները, «ներքին դիտում» գործողության արդյունքները գաղտնազերծելու և ԱԱԾ-ին տրամադրելու, կամ երկու ամիս ժամկետով գաղտնալսումներ թույլատրելու մասին, հրապարակում էր արդեն ավելի մանրամասն: Այնպես որ՝ գործընթացը շատ դանդաղ էր առաջ գնում, մանավանդ, որ հանրային հետաքրքրություն ներկայացնող որևէ ապացույց այս նիստին այդպես էլ չհրապարակվեց՝ 12-րդ հատորը այդ առումով «աչքի չընկավ»:
Ընդմիջումից հետո Հայր Անտոնը հանդես եկավ հայտարարությամբ. ««Համոզմունք ունեմ, թե մեղադրողը չի ուսումնասիրել մեր խնդիրները: Միայն այսօրվա նրա կարդացածը անիմաստ էր… Խնդրում եմ՝ ժամանակ տվեք մեղադրողին, որ ուսումնասիրե հատորները, և՛ մեր, և՛ ձեր ժամանակը խնայե…»:
Ամբաստանյալ Հարություն Սարիբեկյանը հանկարծ վեր կացավ ու հրաժարվեց իր շահերի հանրային պաշտպան Ռուզաննա Սիրեկանյանից ու նրան փոխարինող հանրային պաշտպան Անժելիկա Հակոբյանից: Նա ասաց, թե իր պաշտպանությունը պատրաստ է ստանձնել փաստաբան Նարինե Ռշտունին:
Դատական նիստը հետաձգվեց՝ նոր փաստաբանին ներգրավելու հարցը հաջորդ նիստին լուծելու համար:
Հիշեցնենք, որ ըստ մեղադրանքի՝ հանցավոր «համագործակցությունը, կազմակերպված խումբը» ստեղծել ու ղեկավարել է Արթուր Վարդանյանը:
Խմբի կազմում ապօրինի կերպով ձեռք են բերվել զենք, ռազմամթերք, պայթուցիկ նյութեր, սարքեր՝ ՀՀ իշխանությունը բռնությամբ զավթելու նպատակով, սակայն 2015 թվականի նոյեմբերի 25-ին ՀՀ ազգային անվտանգության ծառայության աշխատակիցները վնասազերծել են բացահայտված խմբի անդամներին:
Հայր Անտոնը՝ «Ռադիո Մարիամ» մշակութային հիմնադրամի տնօրեն, Գյումրու Կաթոլիկե եկեղեցու քահանա, ՀՀ և Ավստրալիայի քաղաքացի Անտոն Դիկար Թոթոնջյանը, ըստ մեղադրանքի՝ 2015 թվականի ապրիլից «անձնապես» ծանոթացել է Իսպանիայից Հայաստան ժամանած Արթուր Վարդանյանի հետ, մասնակցել է վերջինիս ստեղծած հանցավոր «համագործակցությանը»՝ ֆինանսավորելով այն:
Ըստ մեղադրանքի՝ Վահան Շիրխանյանը 2015 թվականի մայիսից «անձնապես» ծանոթանալով Հայր Անտոնի, Իսպանիայից ժամանած Արթուր Վարդանյանի հետ, նրանց առաջարկությամբ ստանձնել է մասնակցել վերջինիս ստեղծած հանցավոր համագործակցությանը…
Ամբաստանյալներին մեղադրանք է առաջադրված ՀՀ քրեական օրենսգրքի 223 հոդվածի 2-րդ, 235 հոդվածի 3-րդ, 35-300 հոդվածի 1-ին մասերով: