Հայաստանը պայքարում է «քաոսի իշխանությունների» դեմ` լուրջ աջակցություն ստանալով «հակաքաոսային կոալիցիայից»: Նման կարծիք հունիսի 6-ին լրագրողների հետ հանդիպման ժամանակ հայտնեց նախկին «Ղարաբաղ» կոմիտեի անդամ Աշոտ Մանուչարյանը:
Նրա խոսքով՝ այդ նույն «քաոսի իշխանությունները» փորձում են մեծացնել քաոսի ներուժը ղարաբաղյան հակամարտության մեջ՝ դրանով իսկ խաթարելով խաղաղությունը տարածաշրջանում: «Վերջին 10 տարվա ընթացքում Բաքուն քաոսի գործիք է դարձել: Ադրբեջանում ոչ ոք ոչինչ չի որոշում. այնտեղ ամեն ինչ տեղի է ունենում քաոսի իշխանությունների կամոք, և այդ իշխանությունների զոհն առաջին հերթին դառնում է Ադրբեջանի ժողովուրդը»,- նշեց Մանուչարյանը:
Նա հավելեց, որ Ադրբեջանի՝ որպես քաոսի մշտական գործիք կարգավիճակը, անշուշտ, կհանգեցնի այս երկրի խորքային վերափոխմանը եւ նույնիսկ՝ կործանարար գործողությունների. Մերձավոր Արեւելքում արդեն սկսվել է հատուկ ծառայությունների լրտեսական պատերազմը, որն անխնա հարվածներ է հասցնում միմյանց: Սա, կարծում է քաղաքագետը, կուրախացնի հակաքաոսային կոալիցիային, քանի որ քաոսի իշխանությունների ամեն մի ձախողում հնարավորություն է տալիս հզոր հակահարվածի համար:
«Հայաստանն այս բոլոր գործընթացներում հատուկ կարգավիճակ ունի հակաքաոսային կոալիցիայի համար, քանի որ առաջինն է տարածաշրջանում պայքար սկսել քաոսի դեմ: ՀՀ իշխանությունների մի մասը, որն իրականացնում է այս ծրագիրը, լուրջ աջակցություն են ստանում կոալիցիայի կողմից»,- եզրափակեց նախկին «Ղարաբաղ» կոմիտեի անդամը:
