ՀՀ ազգային վիճակագրական կոմիտեն հրապարակել է ՀՀ սոցիալ-տնտեսական վիճակը բնութագրող վերջնական ցուցանիշները հունվար-հուլիս ամիսների հաշվարկով:
Ինչպես արդեն բազմիցս նշվել է, 2019թ. հունվար-հուլիս ժամանակահատվածում 2018թ.-ի համեմատությամբ գրանցվել է ՏԱՑ-ի 6.8%-անոց աճ: Արդյունաբերության ոլորտում աճը կազմել է 8.4%, շինարարության ծավալներն աճել են 4.5%-ով, առևտրի շրջանառությունը՝ 8.9%-ով, ծառայությունների ոլորտում գրանցվել է 15.2%-անոց աճ, էլեկտրաէներգիայի արտադրությունը նվազել է 5%-ով, միջին ամսական անվանական աշխատավարձն աճել է 5.9%-ով, արտաքին առևտրաշրջանառությունը՝ 2.3%-ով: Ընդ որում, արտահանումը՝ 3.0%-ով, ներմուծումը՝ 1.9%-ով:
Արդյունաբերության մեջ հանքագործական արդյունաբերություն և բացհանքերի շահագործում ճյուղում գրանցվել է 9.5%-անոց աճ: Ընդ որում, մետաղական հանքաքարի արդյունահանումն աճել է 10.1%-ով: Հանքագործական արդյունաբերության մյուս ճյուղերում աճը 5%-ից բարձր է, իսկ հանքագործականին հարակից գործունեության ոլորտում շուրջ 62%-ոց անկում է գրանցվել:
Հանքագործական արդյունաբերության մեջ պղնձի խտանյութի արտադրության ծավալներն աճել են պակաս, քան 1%-ով: Ցինկի արտադրության ծավալները նվազել են 8.4%-ով: Գրեթե 29%-անոց աճ է արձանագրվել մոլիբդենի արտադրության ոլորտում: Ոչ մետաղականներից ավելի քան 24%-ով աճել է տուֆի արդյունահանումը, գրեթե 27%-ով՝ ավազի ու խճի: Մինչդեռ շինարարության առումով երրորդ կարևորագույն բաղադրիչի՝ցեմենտի արտադրության ծավալներն աճել են հազիվ 0.6%-ով:
10,4%-անոց աճ է արձանագրվել մշակող արդյունաբերության ոլորտում: Այստեղ առաջատարը հանդիսացող սննդամթերքի արտադրության ոլորտում աճը կազմել է 7.6%: Խմիչքի արտադրությունն աճել է 9.8%-ով, ծխախոտինը՝ 17.0%-ով: Մանածագործական իրերի, հագուստեղենի և ընդհանրապես այս ոլորտի գրեթե բոլոր ենթաոլորտներում երկնիշ, որոշ դեպքերում նույնիսկ 30-40%-անոց աճ է:
Աննշան անկում կա Հայաստանի տնտեսության համար տրադիցիոն դեղագործական արտադրանքի արտադրության ոլորտում. մոտ 5%-անոց անկում՝ հիմնային մետաղների արտադրությունում, ավելի քան 2%-անոց՝ համակարգիչների, էլեկտրոնային և օպտիկական սարքավորանքի արտադրությունում:
Էլեկտրաէներգիայի արտադրության ոլորտում այդպես էլ չի հաջողվում բեկում մտցնել շարունակական անկման մեջ: Այստեղ ծավալների նվազումը կազմում է շուրջ 4%:
Ջրամատակարարման, կոյուղու, թափոնների կառավարման և վերամշակման ոլորտում 1%-ից պակաս աճ է արձանագրվել:
Ամբողջ արդյունաբերական արտադրանքի առյուծի բաժինը՝ գրեթե 68%-ը, ներկայացնում է մշակող արդյունաբերությունը: 17.4%-ը կազմում է հանքահումքային արդյունաբերությունը, 13.4% էլեկտրաէներգիայի արտադրությունն է ու գազի մատակարարումը: Հանքագործական արդյունաբերությունն էլ հիմնականում մետաղական հանքաքարի արդյունահանումն է, որ նշյալ ժամանակամիջոցում կազմել է ընդհանուրի գրեթե 97%-ը:
Մշակող արդյունաբերության ամենամեծ ճյուղը սննդամթերքի արտադրությունն է, որ տալիս է ընդհանուրի 33% արտադրանքը: Երկրորդը ծխախոտի արտադրությունն է՝ 14.4%, խմիչքների արտադրությունը չորրորդն է՝ 12.5%-ով: Իսկ մշակող արդյունաբերության երրորդ տեղում հիմնային մետաղների արտադրությունն է՝ 13.4%-ով:
Սննդամթերքի արտադրության ոլորտում կարևորագույններից՝ մսի արտադրության ծավալները նվազել են 4.5%-ով: Հրուշակեղենի արտադրությունը նվազել է ավելի քան 30%-ով: Շաքարի արտադրությունը նվազել է ավելի քան 14%-ով, զտած յուղերինը՝ 38.5%-ով, ոչ ալկոհոլային խմիչքներինը՝ գրեթե 25%-ով, կերակրի աղի արտադրությունը՝ գրեթե 9%-ով: Մնացած բոլոր սննդամթերքների, խմիչքեղենի և ծխածոտի պարագայում արձանագրվել է աճ, բազմաթիվ դեպքերում՝ երկնիշ:
Փաստորեն նույն վիճակագիրների տվյալներով՝ բազմաթիվ դեպքերում արտադրության ծավալները երկնիշ աճ են գրանցում, նույն ընթացքում սրանց գներն էլ շուկայում երկնիշին մոտ աճում են: Հանքարդյունաբերության ոլորտում ոչ մետաղականի արդյունահանման երկնիշ աճ է արձանագրվում, մինչդեռ շինարարության ոլորտում աճն աննշան է, ու առաջանում է անհասկանալի անհամապատասխանություն, հատկապես, որ արդյունահանման մեծ աճն ու շինարարության ծավալների աննշան աճը շարունակվում են տևական ժամանակ: Խաղողի արտադրության ծավալները վերջին մի քանի տարիներին կայունորեն նվազում են, մինչդեռ գինու և կոնյակի արտադրության ծավալները ամսեամիս կայունորեն աճում են:
Ինչևէ: Հայաստանի տնտեսությունն աճում է, և դա փաստում են ԱՎԾ-ի տվյալները: Իսկ թվերը համառ բան են, նրանց հետ վիճել չի կարելի: