«Առաջին լրատվական»-ի զրուցակիցը արտակարգ և լիազոր դեսպան, Արցախի ԱԳ նախկին նախարար Արման Մելիքյանն է։
–Պարոն Մելիքյան, Ռուսաստանի փոխվարչապետ Յուրի Բորիսովը նախօրեին Երևանում հայտարարել է, թե Ռուսաստանը դեմ չէ, որ Ադրբեջանը դիտորդի կարգավիճակ ստանա ՀԱՊԿ–ում։ Ինչպե՞ս կմեկնաբանեք այս հայտարարությունը։
-Ռուսաստանը շահագրգռված է, որպեսզի Ադրբեջանը ՀԱՊԿ-ի հետ հնարավորինս սերտ համագործակցություն ունենա, և դիտորդի կարգավիճակը կարող է այն առաջին քայլը դառնալ, որին կհաջորդի նաև լիիրավ անդամության հայտը: Պաշտոնական Բաքվի համար ևս ՀԱՊԿ-ի հետ առավել սերտ համագործակցությունը կարող է նոր հնարավորություններ պարունակել հատկապես Արցախի նկատմամբ ճնշումներն ավելացնելու տեսանկյունից:
–Ի՞նչ վտանգներ կարող են սպասվել Հայաստանին և Արցախին՝ ՀԱՊԿ–ում նման զարգացումների դեպքում։
– Թեև առայժմ խոսվում է Ադրբեջանին դիտորդի կարգավիճակ տալու մասին, մենք պետք է առաջին հերթին հաշվի առնենք, որ հաջորդ քայլով պաշտոնական Բաքուն կարող է համաձայնվել դառնալ ՀԱՊԿ լիիրավ անդամ, իսկ այդ դեպքում կազմակերպության մնացյալ անդամների համար նաև Արցախն է հայտնվելու այդ կազմակերպության գործունեության անմիջական տիրույթում և պաշտոնական Բաքվի պահանջով կարող է դառնալ հատուկ ռազմական գործողության թիրախ:
–Կարո՞ղ է արդյոք Հայաստանը ՀԱՊԿ–ում դեմ քվեարկել նման առաջարկին, ինչպե՞ս պիտի վարվել նման դեպքում, եթե առաջարկի Ադրբեջանին նման կարգավիճակ տալ։
-Քանի դեռ Արցախի Հանրապետության տարածքային ամբողջականությունն ու անվտանգությունը երաշխավորված չեն նրա՝ Ադրբեջանի կազմից դուրս փաստական կարգավիճակի պաշտոնական ճանաչման միջազգային ակտով, որի տակ կլինեն ՄԱԿ-ի Անվտանգության խորհրդի անդամ-պետությունների կամ, առնվազն, Մինսկի խմբի համանախագահ պետությունների ղեկավարների ստորագրությունները, Ադրբեջանի՝ ՀԱՊԿ հետ համագործակցության ցանկացած ձևաչափ մեզ համար չի կարող ընդունելի լինել: Ուստի, կարծում եմ, որ Հայաստանը պաշտոնապես պետք է առանց վարանելու արգելափակի այս ուղղությամբ նախաձեռնվող բոլոր քայլերը, անկախ նրանից, թե ով հանդես կգա համապատասխան առաջարկով:
–Արդյոք այդ կերպ Ռուսաստանը չի՞ փորձում վնաս հասցնել ՀՀ գործող իշխանություններին՝ հաշվի առնելով հայ–ռուսական հարաբերությունների ներկա վիճակը։
-Ադրբեջանը ՀԱՊԿ-ի հետ առավել սերտ համագործակցության, ապա նաև անդամության հետ կապված խոչընդոտների վերացումը Մոսկվայի կողմից վարվող քաղաքականության կարևոր բաղադրյալ է լինելու՝ անկախ նրանից, թե Հայաստանի ղեկավարությունն ինչպիսի անհատական կազմ ունի կամ կունենա առաջիկայում: Սա, ինչ խոսք, տհաճ իրողություն է, որից մեզ համար բխող վտանգներն անհրաժեշտ է չեզոքացնել սեփական արդյունավետ քաղաքական հակաքայլերով: