Ֆուտբոլիստներ, ովքեր հաղթահարել են քաղցկեղը

8 ֆուտբոլիստներ, ովքեր բախվել են քաղցկեղին, բայց կարողացել են հաղթել այս հիվանդությանը:

Էրիկ Աբիդալ («Բարսելոնա»)

2011 թվականի մարտին Էրիկ Աբիդալի մոտ ախտորոշեցին լյարդի քաղցկեղ: Իրավիճակը բավականին լուրջ էր: Հնարավորությունները գնահատվում էին 50-50: Խաղացողի առողջական վիճակն այնքան էր հուզել բոլորին, որ նույնիսկ Մադրիդի «Ռեալի» խաղացողները, չնայած կատալանացիների հետ սուր մրցակցությանը, վերնաշապիկներ հագան «Ամեն ինչ լավ կլինի, Էրիկ» մակագրությամբ:

Եվ նրանք ճիշտ էին: Արդեն 2012 թվականի փետրվարին բժիշկները թույլ տվեցին Աբիդալին մարզվել, իսկ մեկ տարի անց ֆուտբոլիստը վերադարձավ «Բարսելոնա»: «Բարսելոնա»-«Մալյորկա» խաղում Աբիդալը փոխարինեց Պիկեին: Երբ կատալոնական ակումբը դարձավ Չեմպիոնների լիգայի հաղթող, թիմի ֆուտբոլիստները հենց Աբիդալին տվեցին բաղձալի գավաթը բարձրացնելու իրավունքը:

Այժմ Էրիկը այլևս չի խաղում: Մի քանի տարի առաջ նա ավարտեց իր կարիերան: Սակայն Աբիդալը չի հեռացել ֆուտբոլից: Այս պահին նա կատալոնական ակումբի մարզական տնօրենն է: Հիշեցնենք, որ «Բարսելոնան» բուժման ընթացքում չդադարեցրեց պայմանագիրը ֆուտբոլիստի հետ: Աբիդալը ոչ միայն ստանում էր իր աշխատավարձը, այլև կատալոնական ակումբը հոգում էր նրա բուժման ծախսերի մի մասը:

Ջոն Հարտսոն («Սելթիկ»)

Ջոն Հարտսոնը կարիերայի ավարտից հետո չկարողացավ խուսափել այս սարսափելի հիվանդությունից: Նրա մոտ հայտնաբերվեց թոքի քաղցկեղ, իսկ ավելի ուշ բացահայտվեց, որ նա ունի ոչ միայն թոքի, այլ գլխուղեղի քաղցկեղ:

Հարտսոնը միշտ թողել է շատ ուժեղ ֆուտբոլիստի տպավորություն: Իր ուժեղ բնավորությունը ֆուտբոլիստը ցույց տվեց նաև հիվանդության դեմ պայքարելիս: 2007 թվականին բացահայտվեց ֆուտբոլիտի հիվանդությունը, իսկ 2009 թվականին մի շարք քիմիաթերապիաներից հետո ֆուտբոլիստն արդեն առողջ էր:

Ֆրանչեսկո Աչերբի («Սասուոլո»)

Ֆրանչեսկոն 2013 թվականի ամռանը տեղափոխվեց «Սասուոլո» և անցավ բժշկական քննություն: Բժիշկները պարզեցին, որ ֆուտբոլիստը ունի ամորձիների քաղցկեղ:

Ֆուտբոլիստը շատ հանգիստ ընդունեց իրականությունը և արդեն 2 օր անց վիրահատվեց: Արդեն սեպտեմբերին Աչերբին անցկացրեց իր առաջին հանդիպումը:

Սակայն ձմռանը ֆուտբոլիստի արյան մեջ հայտնաբերվեց արգելված դեղամիջոց`գոնադոտրոպին: Այս դեղը օգտագործվում է ամորձիների օնկոլոգիայի բուժման մեջ: Ֆուտբոլիստը նշեց, որ ոչ մի բան չի օգտագործել, և դա նշանակում է, որ քաղցկեղը կրկին վերադարձել է: Բայց ամեն ինչ ավարտվեց 2014 թվականի գարնանը: Աչերբին ամբողջությամբ բուժվեց և վերադարձավ մարզումների:

Խոնաս Գուտիերես («Նյուքասլ»)

Ֆուտբոլիստը իմացավ իր հիվանդության մասին այն ժամանակ, երբ «Արսենալի» հետ խաղում հարված ստացավ: Ցավերը չէին դադարում, և ֆուտբոլիստը բժշկական քննություն անցավ: Քննությունը ցույց տվեց, որ ֆուտբոլիստը ունի ամորձիների քաղցկեղ:

Գուտիերեսը երկար ժամանակ թաքցնում էր իր հիվանդությունը, սակայն հետագայում դա անդրադարձավ նրա մարզավիճակի վրա:

Ֆուտբոլիստը սկսեց բուժման կուրս անցել, սակայն արդեն մի փոքր ուշ էր: Հիվանդությունը սկսել էր տարածվել նաև նրա մարմնի այլ մասերում: Գուտիերեսը համաձայնեց վիրահատության, և հեռացրին նրա ամորձին:

Այս ամենից հետո ֆուտբոլիստն իր մեջ ուժ գտավ և վերադարձավ մեծ ֆուտբոլ:

Խոսե Ֆրանսիսկո Մոլինա («Դեպորտիվո»)

2002-ին խաղացողը իմացավ հիվանդության մասին: Իր կարիերայի սկզբում նա ստացել էր վնասվածք, որը զարգացավ և հանգեցրեց հիվանդության առաջացմանը: Ֆուտբոլիստի մոտ ևս հայտանաբերվել էր ամորձիների քաղցկեղ: Բայց Մոլինան կարողացավ հաղթել այս խաղում, քաղցկեղը պարտվեց:

«Դեպորտիվոյի» խաղացողը կարողացավ վերականգնվել վիրահատությունից երկու ամիս հետո և շարունակեց խաղալ մինչև 37 տարեկանը:

Սթիլյան Պետրով («Աստոն Վիլլա»)

Խաղերից մեկի ժամանակ Պետրովը անհանգստություն զգաց և անցավ թեստերը: Արդյունքը սարսափելի էր, խաղացողի մոտ հայտնաբերվեց լեյկեմիա: Այնուամենայնիվ, ֆուտբոլիստը չհուսահատվեց և սկսեց պայքարել:

Պետրովը սկսեց երկարատև բուժման կուրսեր անցնել: Ֆուտբոլիստին ասել էին, որ նա այլևս երբեք չի կարողանա դաշտ դուրս գալ: Բայց, Պետրովը զարմացրեց բոլորին՝ վերադառնալով ֆուտբոլ: Ճիշտ է, նա վերադարձավ սիրողական ֆուտբոլ, բայց կարողացավ անգամ մրցանակներ նվաճել:

Ալան Ստաբբս («Սելթիկ»)

Շոտլանդացի պաշտպանը հայտնաբերեց, որ ամորձիների քաղցկեղ ունի 1998 թվականին: Այդ ժամանակ տեխնոլոգիաները արդեն թույլ էին տալիս բուժել այդպիսի հիվանդությունները: Այնպես որ, ֆուտբոլիստը արագ վերականգնվեց:

Սակայն այս դեպքում էլ կրկնվեց Աչերբիի պամությունը: Հիվանդությունը հայտնաբերվեց երկրորդ անգամ: Այս դեպքում էլ Ստաբբսը կարողացավ վերականգնվել և վերադառնալ մեծ ֆուտբոլ: Այժմ նա զբաղվում է մարզչական գործունեությամբ:

Հերման Բուրգոս («Ատլետիկո Մադրիդ»)

«Ատլետիկոյի» նախկին դարպասապահը հաջողությամբ հաղթահարեց երիկամների քաղցկեղը: Խաղացողը նույնիսկ չդադարեցրեց իր կարիերան: Երբ Բուրգոսն իմացավ ախտորոշման մասին, նա վիրահատությունը տեղափոխեց երկուշաբթի օրը, քանի որ հանգստյան օրերին թիմը խաղ ուներ:

Այժմ Բուրգոսը մադրիդյան ակումբի գլխավոր մարզիչ Դիեգո Սիմեոնեի օգնականն է:

Սիրարփի Աղաբաբյան