Թեյլոր Սվիֆթը Vogue-ի համար ֆոտոշարքի է մասնակցել և զարդարել ապագա համարի շապիկը: Հարցազրույցում 29-ամյա երգչուհին և աշխարհի ամենահարուստ, ամենաազդեցիկ աստղերից մեկը պատմել է, թե ինչպես է վերականգնվել Քիմ Քարդաշյանի և Քանյե Ուեսթի հետ սկանդալային պատմությունից հետո:
2016-ին Քանյե Ուեսթի Famous երգի տեսահոլովակը պայթեցրեց ինտերնետը և սկանդալ առաջացրեց: Դրա պատճառն այն էր, որ տեսահոլովակում ռեփերը ոչ միայն վատ էր արտահայտվել Թեյլոր Սվիֆթի մասին, այլև ցուցադրել էր երգչուհու մերկ մոմե կրկնօրինակը:
Երգչուհու վրդովմունքին պատասխանել էր Քիմ Քարդաշյանը՝ տրամադրելով կատարողների հեռախոսային խոսակցության ձայնագրությունը, որտեղ Սվիֆթն իր համաձայնությունն էր հայտնում երգի բառերի վերաբերյալ: Չնայած որ իրավիճակը երկիմաստ էր, ցանցում մի ամբողջ արշավ էր սկսվել Թեյլորի դեմ, որին միլիոնավոր օգտատերեր օձ էին անվանել:
«Չեմ կարծում, որ շատ մարդիկ կան, որոնք կարող են իսկապես հասկանալ, թե ինչ է նշանակում, երբ միլիոնավոր անծանոթ մարդիկ հրապարակայնորեն ատում են քեզ և հրամայում ձայնդ կտրել, անհետանալ կամ նույնիսկ սպանել ինքդ քեզ: Ես հասկացա, որ պետք է վերակառուցեմ իմ ամբողջ կյանքը, քանի որ այն լիովին անվերահսկելի էր: Ինձ պետք էր այդ մասին երգ գրել, քանի որ դա գոյատևելու միակ միջոցն էր: Դա իմ հոգեկան առողջությունը պահպանելու միակ միջոցն էր, ինչպես նաև աշխարհին պատմելու, թե ինչպես կարելի է վերապրել նման նվաստացումը»,- ասել է Սվիֆթը:
]