Երեկ ԱՄՆ դեսպանը հանդես է եկել Հայաստանում իր գործունեության ծրագրերի և ուղեգծերի մասին ելույթով: Նա, մասնավորապես, նշել է. «Թեպետ Հայաստանը աշխարհագրությամբ և պատմությամբ կապված է Ռուսաստանի հետ, սակայն արժեքներով կապված է Արևմուտքին»: Թեմայի շուրջ զրուցելու համար «Առաջին լրատվական»-ը հյուրընկալել է միջազգայնագետներ Սուրեն Սարգսյանին և Լիանա Հովհաննիսյանին:
Լիանա Հովհաննիսյանը այս առնչությամբ նշեց. «Ինչպես և սպասելի էր, հիմնական առաջնահերթությունը վերաբերում էր այս փուլում Հայաստանում ժողովրդավարության ամրապնդմանը և շարունակական զարգացմանը, ուստի պատահական չէր, որ դեսպանի ելույթի հիմնական թիրախային մասը հիմնված էր ԱՄՆ կողմից տրամադրվող օգնությունների վրա, որը, ըստ դեսպանի, լինելու է շարունակական»:
Հաշվի առնելով ԱՄՆ վարչակազմի ներկայիս քաղաքականությունը՝ մեր զրուցակիցը բնական է համարում, որ կարևորվեց նաև տնտեսական համագործակցությունը. «Կարծես ԱՄՆ-ը փորձում է գտնել եզրեր, որտեղ կարելի է ընդլայնել ոլորտային համագործակցությունը, որը կբխի երկուստեք շահերից»:
Սուրեն Սարգսյանի կարծիքով էլ՝ դեսպանի ելույթում կային նաև Հայաստանի և ԱՄՆ հարաբերություններին առնչվող կարևոր տողատակեր, խնդիրներ, քաղաքական գնահատականներ. «Շատ կարևոր էին այն մեսիջները, որոնք փոխանցեց դեսպանը ՀՀ իշխանություններին»:
Նրա խոսքով՝ ԱՄՆ-ի այսօրվա վարչակարգի համար այլևս առաջնահերթություն չէ աշխարհի տարբեր պետություններին մեծածավալ ֆինանսական օժանդակություն տալը. «Իրավիճակ է փոխվել ոչ միայն Հայաստանում, այլև Թրամփի ընտրություններից հետո՝ նաև Միացյալ Նահանգներում»:
Հարցազրույցն ամբողջությամբ՝ տեսանյութում: