Հայաստանի և Արցախի անվտանգության խորհուրդները հնարավոր է առաջիկայում կրկին համատեղ նիստ գումարեն։ Հեղափոխությունից հետո սա Հայաստանի և Արցախի Անվտանգության խորհուրդների երրորդ համատեղ նիստը կլինի: Առաջինը տեղի է ունեցել 2019 թվականի մարտի 12-ին՝ Ստեփանակերտում, ՀՀ վարչապետ Նիկոլ Փաշինյանի և ԱՀ նախագահ Բակո Սահակյանի համանախագահությամբ: Երկրորդ համատեղ նիստը տեղի է ունեցել դեկտեմբերի 23-ին՝ Երևանում, Նիկոլ Փաշինյանի, Բակո Սահակյանի և ՀՀ նախագահ Արմեն Սարգսյանի մասնակցությամբ:
Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանն «Առաջին լրատվական»-ի հետ զրույցում չբացառեց Անվտանգության խորհրդի հերթական համատեղ նիստի անցկացումը մոտ օրերս։ Բաբայանը նաև հավելեց. «Կարող է լինել, մենք հանրությանը տեղյակ կպահենք»։
Նիստը Երևանո՞ւմ, թե՞ Ստեփանակերտում կանցկացվի՝ հարցին ի պատասխան մեր զրուցակիցն ասաց. «Երևի Ստեփանակերտում։ Համատեղ նիստերը, դուք գիտեք, արդեն դարձել են բարի ավանդույթ։ Դրանք պարբերական բնույթ են կրում, մի անգամ Ստեփանակերտում եղավ, վերջինը Երևանում՝ դեկտեմբերի 23-ին»։
Քաղաքագետ Ռոբերտ Ղևոնդյանն «Առաջին լրատվական»-ի հետ զրույցում նշեց՝ չափազանց դրական է, որ Անվտանգության խորհուրդների համատեղ նիստի անցկացումը ավանդույթ է դառնում. «Նման նիստի անցկացումը շատ հարցեր համատեղ քննարկելու հնարավորություն է տալիս, ինչը նախկինում պակասում էր։ Գիտեք, որ նախկինում, երբ ինչ-որ բան քննարկվում էր, բանակցությունների ժամանակ հետո անձամբ Սերժ Սարգսյանը, իսկ նրանից առաջ Ռոբերտ Քոչարյանը գնում էին Արցախ ու այնտեղի ղեկավարության հետ հանդիպում, դա անձնական մակարդակում էր արվում։ Իսկ հիմա Անվտանգության խորհուրդների համատեղ նիստը ավելի ֆորմալացրել է այդ հանդիպումները ու ինստիտուցիոնալ առումով ավելի շատ հնարավորություններ է տալիս կողմերին իրենց տեսակետները հայտնելու և տեղավորելու ավելի մեծ ժողովրդականություն վայելող, ավելի ընդունելի տարբերակներ բանակցություններում առաջընթացի համար։ Ըստ իս՝ դա այն ձևաչափն է, որը պետք է աշխատի, և որը հնարավորություն է Հայաստանի ու Արցախի համար միասնական դիրքորոշում ձևավորելու ու այդ միասնական դիրքորոշմամբ հանդես գալու աշխարհում»։
Մեր զրուցակիցը սպասվող նիստը չի կապում Արցախի՝ մարտի 31-ին կայանալիք խորհրդարանական և նախագահական ընտրությունների հետ .«Կարծում եմ՝ սա ավելի շատ կապված է Մյունխենի դեբատից հետո որոշակի ճշգրտումների հետ, ինչպես նաև հնարավոր է պաշտպանական համակարգի ներկայիս խնդիրների, այն պաշտոնանկությունների հետ, որոնց մասին մամուլում գրվում է»։
Դիտարկմանը, թե կարո՞ղ ենք փաստել, որ ՀՀ իշխանություններն ավելի հաշվետվողական են դարձել, մեր զրուցակիցը պատասխանեց. «Ոչ թե ավելի հաշվետվողական են դարձել, այլ գործընթացները սկսել են միասնաբար իրականացվել։ Նախկինում Հայաստանի կառավարման համակարգը բրգաձև էր, ու բրգի գլխին կանգնած էր մեկ մարդ, դա տարածվում էր նաև Արցախի վրա, որոշումները կայացվում էին բրգի գլխում, այնուհետև տեղեկացվում էր ու փորձ էր արվում համոզել, որ այն որոշումը, որ կայացվել է՝ ճիշտ է։ Ներկայումս որոշումներ կայացնողների շրջանակն ընդլայնվել է, ինչը շատ ճիշտ է, որովհետև ցանկացած ժողովրդավարական համակարգում, առավել ևս՝ այսպիսի կարևոր հարցերում, մեծ շրջանակի մասնակցությունը կարևոր է։ Կարելի է ասել, որ Հայաստանի և Արցախի անվտանգային ոլորտի ներկայացուցիչները միասնաբար են որոշակի արդյունքներ ձևավորում, ու դրանք հնարավորություն են տալիս Հայաստանին հետագայում ավելի ճկուն լինելու միջազգային հարաբերություններում»։
Մեր հաջորդ դիտարկմանը՝ արդյոք սա նաև դրական չէ՞ Փաշինյանի շարունակական այն պնդման ֆոնին, որ Արցախը պետք է վերադառնա բանակցությունների սեղանին, և արդյոք սա նաև Արցախի սուվերենության ընդգծում չէ՞, Ռոբերտ Ղևոնդյանը պատասխանեց. «Իհարկե։ Սա նաև Արցախի սուվերենության ընդգծում է։ Նաև ինչ-որ մակարդակում կարելի է ասել՝ սա միջանկյալ լուծում է Արցախի մասնակցության հարցում։ Գոնե միջազգային հանրության աչքին այդպես կարելի է ցույց տալ, որ այժմ մենք միջանկյալ ձևով այդ հարցը մեզ համար լուծել ենք, Արցախը մասնակցում է այս ձևաչափով, մինչև որ Ադրբեջանն ու միջազգային հանրությունը կընդունեն մեր այն մոտեցումը, որ Արցախը պետք է մասնակցի բանակցություններին, քանի որ առանց Արցախի արցախյան հարցի լուծում հնարավոր չէ»։
