Արցախի ներկա և նախկին նախագահները՝ Բակո Սահակյանը և Արկադի Ղուկասյանը, ամենայն հավանականությամբ, դատարան կներկայանան վաղը ուշ երեկոյան` երկրորդ նախագահ Ռոբերտ Քոչարյանի խափանման միջոց կալանավորումը փոխելու վերաբերյալ իրենց երաշխավորագիրը ներկայացնելու համար:
Այսօր ընթացող դատավարության ընթացքում Քոչարյանի պաշտպան Հովհաննես Խուդոյանը դատարանին խնդրեց, որպեսզի երաշխավորները ներկայանան ուրբաթ՝ մայիսի 17-ին, օրվա երկրորդ կեսին, իսկ եթե ոչ, թույլ տալ նրանց հետ կապ հաստատել հեռակապի միջոցով:
Նախագահող դատավոր Դավիթ Գրիգորյանը բացառեց հեռակապի հնարավորությունը, քանի որ երաշխավորներին իրենց իրավունքներն ու պարտականությունները պարզաբանելուց բացի անհրաժեշտ է նաև նրանց ստորագրությունը։
«Երաշխավորը պետք է նախազգուշացվի նաև նախատեսվող քրեական պատասխանատվության մասին», - հայտարարեց դատավորը:
Մայիսի 17-ը ընդունելի ժամկետ չէր դատարանի համար, քանի որ կալանքի ժամկետը լրանում է մայիսի 19-ին՝ կիրակի, նախորդող օրը ևս հանգստյան է, իսկ դատարանը մեկ օրվա ընթացքում պարզապես չի հասցնի գնալ խորհրդակացական սենյակ և դատական ակտ կազմել։
...
