Մի շարք իրավապաշտպաններ, փաստաբաններ և հատկապես 2008 թվականի մարտիմեկյան արյունալի իրադարձություններից հետո քաղաքական դրդապատճառներով ազատազրկված մի քանի տասնյակ անձինք դիմել էին Կառավարությանը՝ հորդորելով հետ կանչել Վահրամ Ավետիսյանի առաջադրումը որպես Սահմանադրական դատարանի դատավորի թեկնածու: Նրանք պնդում են՝ Սահմանադրական դատարանի բարեփոխումները պետք է ուղղված լինեն բարձր դատարանում անկախ դատավոր ունենալուն, մինչդեռ Վահրամ Ավետիսյանը չի համապատասխանում այդ հատկանիշներին: Ընդգծվում է նրա ոչ թե մասնագիտական հատկանիշները, այլ բարոյական պատասխանատվության հարցը, խոսվում է շահերի հնարավոր բախման մասին. թեկնածուի հայրը՝ Դավիթ Ավետիսյանը 2008-ից 2016 թվականներին պաշտոնավարել է որպես Վճռաբեկ դատարանի Քրեական պալատի նախագահ, քննել նաև «Մարտի 1»-ին առնչվող գործեր:
Վահրամ Ավետիսյանը մի քանի օր առաջ լրագրողներին ասել էր, թե չի պատրաստվում դառնալ «դատական համակարգի մեղքերի քավության նոխազը», այս պահին առաջադրումից հրաժարվելու որևէ հիմք չի տեսնում:
ՍԴ դատավորներին ընտրում է Ազգային ժողովը առնվազն 80 կողմ ձայնով, այսինքն՝ ընտրությունը կախված է իշխող մեծամասնության քվեներից:
Թեմայի շուրջ «Ազատություն»-ը զրուցել է խորհրդարանի «Իմ քայլը» խմբակցության պատգամավոր Նիկոլայ Բաղդասարյանի հետ.
Նիկոլայ Բաղդասարյան. – Ես բացառում եմ այն տարբերակը, որ կարող է ընտրվել Սահմանադրական դատարանի մի դատավոր, որը արժանի չի լինի այդ պաշտոնը կրելու: Կարծում եմ՝ սխալ ձևակերպում է, որ հոր պատճառով տղային չպետք է ընտրել, ձևակերպումը բացառապես կարող է լինել այն, որ արդյո՞ք թեկնածուն կարող է ունենալ այնպիսի կախվածություն, որ ազդեցության տակ լինելով՝ այլ որոշում կայացնի, ոչ թե այն, ինչ որ բխում է օրենքից, Սահմանադրությունից: Պայմանական ասեմ իրավիճակ՝ եթե իքս թեկնածուի հոր նկատմամբ կան կոմպրոմատներ, կան նյութեր նախորդ իշխանության ձեռքերում, և դա կաշկանդի տվյալ թեկնածուն ճիշտ որոշում կայացնելու. այս ձևակերպումով մերժելը թեկնածությունը ընդունելի է, այլ ձևակերպումով, որ ուղղակի հայրը նախկինում զբաղեցրել է պետական պաշտոն կամ կայացրել է այս կամ այն գործով դատական ակտը, ինձ համար անընդունելի է:
Վճռաբեկ դատարանի որոշ դատավորների մասին շատ-շատ բաներ կարող ենք ներկայացնել, բայց միաժամանակ դեմ եմ այն մոտեցմանը, որ հայրը այս անձնավորությունն է՝ տղային հետևաբար պաշտոն չտալ կամ տղային վանել մեր հասարակությունից:
«Ազատություն». – Վահրամ Ավետիսյանի դեպքում կա՞ մի փաստարկ, որ կարող եք նշել, որ ահա, այս պատճառով, օրինակ, չի համապատասխանում հեղափոխական չափորոշիչներին, որով պիտի ձևավորվի Սահմանադրական դատարանի նոր կազմը:
Բաղդասարյան. – Ես ուղղում մտցնեմ՝ ոչ թե փաստարկ, որ չի համապատասխանում հեղափոխության չափանիշներին, ա...