Իշխանական պատգամավորի կարծիքով, ամբողջ թիմով պետք է հեռանան, միայն իր մանդատից հրաժարվելը բան չի փոխի

Իշխող խմբակցության պատգամավոր Արմեն Խաչատրյանը վրդովված է իշխանությանն ուղղված մեղադրանքներից, թե ինչու չեն կանխատեսել պատերազմի այսպիսի ելքն ու ավելի վաղ կանգ առել։

Պատգամավորի համոզմամբ՝ դա անհնար էր, քանի որ ելքը ո՛չ Փաշինյանը, ո՛չ Ալիևը, ո՛չ էլ Պուտինը կարող էին որոշել․ - «Պատերազմի ելքը ի սկզբանե ո՛չ շտաբի պետը կարա որոշի, ո՛չ Նիկոլ Փաշինյանը կարա որոշի, ո՛չ Արայիկ Հարությունյանը, ո՛չ Իլհամ Ալիևը, ո՛չ էլ Էրդողանը։ Մենակ Աստված գիտի դրա վերջը ինչ կարա լինի»։

Պատգամավորը լրագրողներից տեղեկացավ, որ պատերազմի հնարավոր ելքը զինված ուժերի գլխավոր շտաբի պետ Օնիկ Գասպարյանը թե՛ պատերազմից առաջ, թե՛ պատերազմի սկզբում կանխատեսել ու վարչապետին զեկուցել է։

Փաշինյանի ստորագրած հայտարարությունից երկու շաբաթ անց Գլխավոր շտաբի ղեկավարը հայտարարեց՝ պատերազմի 4-րդ օրը անվտանգության խորհրդի նիստում ներկայացրել է հայկական կողմի կորուստները և ստեղծված իրադրության վերաբերյալ Զինված ուժերի գնահատականը` առաջարկելով երկու-երեք օրվա ընթացքում անհրաժեշտ է միջոցներ ձեռնարկել պատերազմը կանգնեցնելու համար։

Պատգամավորը կասկածում է․ - «Ես չեմ իմանում Գլխավոր շտաբի պետը նման բան ասել է թե չէ։ Ես նաև կասկածում եմ»։

Արմեն Խաչատրյանը, որը մինչև օրենսդիր մարմին տեղափոխվելը, ոստիկան էր, շարունակում է պնդել՝ պետք է կռվեինք մինչև վերջ․ - «Մինչև վերջին պահը ես ձգտել եմ, որ պետք է կռվել և հաղթանակ տանել։ Կոնկրետ մի պատգամավորը ես եմ, որ միշտ հորդորել եմ, որ պետք է կռվել, ոչ մի քայլ հետ»։

Հիմա էլ պնդում է՝ պատերազմում պարտված իշխանությունը չպետք է հեռանա, քանի որ հանրության լայն շրջանում այդպիսի պահանջ չկա։ Հակառակը՝ քաղաքացիներն իրենց հորդորում են չնահանջել․ - «Բոլորդ փաստում եք, որ կա այդպիսի պահանջ։ Ես հավատում եմ միայն փաստերին, և ոչ թե ֆեյսբուքյան հայտարարություններին ու մի քանի հոգու ցույցերին կամ ճանապարհ փակելուն։ Ես ամենօրյա կապի մեջ եմ ժողովրդի հետ՝ հիմնականում Սյունիքի մարզ, Վայոց Ձորի մարզ և այստեղ, ինչքան որ հնարավոր է։ Եվ հիմնականում պահանջները որ լսում են, ասում են՝ հանկարծ հետդարձ չլինի, հանկարծ կարո՞ղ է հրաժարական լինի, ինչի՞ են էսքան գրում։ Ես էլ ասում եմ, որ նման բան չկա»։

Հրադադարի հայտարարությունը ստորագրելուց հետո իշխող խմբակցությունը լքել են չորս պատգամավոր Գոռ Գևորգյանը, Թագուհի Թովմասյանը, Վարդան Աթաբեկյանը և Գայանե Աբրահամյանը։ Միայն Աբրահամյանն է հրաժարվել մանդատից։ Նա պատերազմից առաջ էր դեռ հայտարարել մանդատը վայր դնելու մասին։

Խմբակցությունը լքելով մանդատը պահելը Արմեն Խաչատրյանը ամոթալի է համարում․ - «Ես դա համարում եմ շատ ամոթ երևույթ այդ պատգամավորների համար»։