Կորոնավիրուսի դեմ առավել արդյունավետ պայքարի համար 64 երկրների շարքում 1 միլիոն 100 հազար դոլարի աջակցություն կստանա նաև Հայաստանը՝ լաբորատոր կարողությունների ամրապնդման, հիվանդության բացահայտման և վերահսկման համար։
ԱՄՆ Պետդեպարտամենտի կայքի փոխանցմամբ՝ ամերիկյան օգնության ընդհանուր ծավալը 274 միլիոն կկազմի։ Հայաստանում ԱՄՆ դեսպանությունը հայտարարել է՝ աջակցությունը կցուցաբերվի Առողջապահության համաշխարհային կազմակերպության և Կարմիր խաչի ու կարմիր մահիկի ընկերությունների միջազգային ֆեդերացիայի միջոցով։ Հայաստանում Կարմիր խաչի միջազգային կոմիտեի պատվիրակության ներկայացուցիչ Զառա Ամատունին «Ազատության»-ը փոխանցեց՝ այս պահին հստակություն չկա՝ ինչին է ուղղվելու ամերիկյան օգնությունը։
Ամատունու խոսքով՝ իրենք կորոնավիրուսի դեմ պայքարին արձագանքելու համար այս պահին էլ համապատասխանեցնում են ընթացքի մեջ գտնվող ծրագրերը։
«Կարևոր առաջին քայլն էր», - արձագանքելով պետդեպարտամենտի որոշմանը՝ ասում է Վաշինգտոնի Հայ դատի գրասենյակի խոսնակ Էլիզաբեթ Չուլջյանը: Բայց, կարծում է, պետք է լինի ավելին: Հենց այս ուղղությամբ են մտադիր աշխատել։
«Գումարները, որոնք որոշված էին Կոնգրեսի կողմից 2020-ի համար, կարող են վերամշակվել, որպեսզի նաև պայքարենք կորոնաժահրի այս իրավիճակի դեմ: Նաև Ամերիկայի Հայ դատի հանձնախումբը պետք է շարունակից աշխատել նաև Կոնգրեսի և Սենատի ղեկավարների հետ, որովհետև ակնկալում ենք, որ հաջորդ օժանդակության ալիքներ պետք է լինեն և այդպես շարունակենք ընդլայնել գումարը», - ասաց Չուլջյանը:
Հայաստանում այսօր ԱՄՆ դեսպանատան տարածած հայտարարության մեջ ժամկետների մասին խոսք չկա։ Հայաստանի վարչապետի նախկին խորհրդական, Վրաստանում գործող «Ալիք մեդիա» հայկական հարթակի գլխավոր խմբագիր Արսեն Խառատյանը կարծում է՝ խոսքն արագ աջակցության մասին է:
«Չենք սպասելու 21 թվականի բյուջեին ամերիկյան, իսկ այնտեղ արդեն մինչև մայիս ամիս, թե տարվա կտրվածով և՛ Հայաստանի, և՛ ընդհանրապես ամերիկյան արտաքին աջակցությունն ինչ ծավալներ կունենա: Ոչ մեկս չգիտենք, թե առաջիկա 1-2 ամսվա կտրվածքով կոնկրետ այս պանդեմիայի դեմ պայքարում ինչպիսի գերակայություններ կարող են փոխվել, բայց այն, որ այս խողովակը բացում է այս ուղղությամբ ամերիկյան աջակցության նոր տարածք, սա դրական է, որովհետև առաջիկայում...
