Միացյալ Նահանգները շարունակում է իր աներկբա աջակցությունը հայտնել Վրաստանի` Հյուսիսատլանտյան դաշինքին անդամակցելու ձգտմանը: Անցած գիշեր Վաշինգտոնում Վրաստանի վարչապետ Մամուկա Բախտաձեի հետ համատեղ ասուլիսի ժամանակ այս մասին հայտարարեց Միացյալ Նահանգների պետքարտուղար Մայք Փոմփեոն:
«Վրաստանի գործադրած ջանքերը ինձ մեծ վստահություն են ներշնչում, թույլ տալով, որպեսզի ես խոսեմ նաև նախագահ Թրամփի և Միացյալ Նահանգների ողջ կառավարության անունից: ՆԱՏՕ-ին անդամակցության ճանապարհին Վրաստանն այսուհետ ևս վայելելու է Միացյալ Նահանգների աջակցությունը: Բացի այդ, հարկավոր է ևս մեկ շատ կարևոր հանգամանք ընդգծել` Վրաստանի պաշտպանական ծախսերը այսօր արդեն կազմում են երկրի ՀՆԱ-ի 2 տոկոսը: Սա այն չափանիշն է, որի կատարումը մենք պահանջում ենք նաև ՆԱՏՕ-ի դաշնակիցներից», - հայտարարում էր Միացյալ Նահանգների պետքարտուղարը:
Վրաստանի վարչապետը աշխատանքային այցով Վաշինգտոն է ժամանել դեռ հունիսի 5-ին: Մամուկա Բախտաձեի ամերիկյան ուղևորության ֆորմալ առիթը Վրաստանի և Միացյալ Նահանգների միջև ռազմավարական գործակցության մասին համաձայնագրի կնքման տասնամյակն է:
«Հաճելի է կրկին Վաշինգտոն վերադառնալ` ԱՄՆ-Վրաստան ռազմավարական համագործակցության տասնամյակը նշելու նպատակով: 2008-ին Վրաստանը ենթարկվեց ռուսական ագրեսիայի, Աբխազիան և Ցխինվալիի տարածաշրջանը օկուպացվեցին: Այդ ճգնաժամից հետո էր, որ Վրաստանը և Միացյալ Նահանգները հատուկ պլատֆորմ ստեղծեցին, որի նպատակն էր մեր երկրի վերականգնումը, պետական ինստիտուտների ամրապնդումը, ժողովրդավարության և օրենքի գերակայության զարգացումը, ռազմական համագործակցության խորացումը, ինչպես նաև երկու երկրների քաղաքացիների միջև կապերի ամրապնդումը», - նշում էր Բախտաձեն:
Անցած գիշեր կայացած մամուլի ասուլիսի ընթացքում Վրաստանի վարչապետը նաև ընդգծում էր, որ Թբիլիսիի և Վաշինգտոնի հարաբերությունները նոր մակարդակի են հասել հատկապես Սպիտակ տան գործող վարչակազմի օրոք:
«Վերջին տասնամյակում մենք Միացյալ Նահանգների հետ կարողացել ենք շատ դինամիկ և համակողմանի գործակցություն զարգացնել: Մեր կապերը աննախադեպ բարձր մակարդակի են հասել հատկապես նախագահ Թրամփի վարչակազմի օրոք», - հայտարարում էր Մամուկա Բա...
