Ուկրաինայի նախկին նախագահ Պյոտր Պորոշենկոյի դեմ քրեական գործ է հարուցվել՝ պետական դավաճանության եւ իշխանության չարաշահման հոդվածներով այն բանից հետո, երբ Ուկրաինայի Գերագույն ռադայի պատգամավոր Անդրեյ Դերկաչը երեկ հրապարակել է Պորոշենկոյի դեմ հնչեղ ապացույց:
Այս մասին հայտնում է «Украинская правда»-ն: Թերթի տվյալներով, դատախազությունը Պորոշենկոյի դեմ գործին է կցելու այն կրիչը, որը ներկայացրել է Դերկաչը: Կրիչի վրա ձայնագրությունն է՝ Պյոտր Պորոշենկոյի, ԱՄՆ-ի նախկին փոխնախագահ Ջո Բայդենի եւ նախկին պետքարտուղար Ջոն Քերիի մասնակցությամբ:
Ավելի վաղ Դերկաչը հրապարակել է հեռախոսային խոսակցությունների ձայնագրություններ՝ ենթադրաբար Բայդենի ու Պորոշենկոյի ձայներով: Այդ ձայնագրությունները, ըստ պատգամավորի, վկայում են միջազգային կոռուպցիայի եւ նխակին նախագահի պետական դավաճանության մասին:
Խոսակցություններից մեկում նշվում է Ուկրաինայի նախկին դատախազ Վիկտոր Շոկինի ազատման մասին՝ Բայդենի պահանջով: Որպես փոխհատուցում, ըստ ձայնագրության, Բայդենը խոստացել է Ուկրաինային փոխանցել 1 միլիարդ դոլար:
Բացի այդ, քննարկվել են խորհրդարանում կոալիցիայի առկայության, Արսենի Յացենյուկի կառավարության հրաժարականի եւ Վլադիմիր Գրոյսմանի կողմից նախարարների կաբինետի հաստատման հարցերը: Ավելին, խոսակցություններից մեկում Պորոշենկոն, դատելով ներկայացված ապացույցներից, Բայդենին հաստատել է Ռադայում կոալիցիայի բացակայության հարցը:
Դերկաչը հայտնել է, որ բոլոր ձայնագրությունները ստացվել են լրագրողներից եւ փոխանցվել գլխավոր դատախազի գրասենյակին՝ հանցագործությունների մասին հայտարարությունների հետ միասին՝ քրեական գործ հարուցելու համար:
Ուկրաինայի նախկին գլխավոր դատախազ Վիկտոր Շոկինը, որը աշխատանքից ազատվել է 2016-ին, երեկվա այս բոլոր բացահայտումներից հետո իրավապահ մարմիններում հայտարարություն է գրել՝ իր աշխատանքներին Բայդենի միջամտության մասին:
Украинские новости» գործակալությունը՝ հետաքննությունների Պետբյուրոյի իր աղբյուրներին հղում անելով հայտնել է հիշյալ հանգամանքով քրեական գործ հարուցելու մասին:
...