30-օրյա կալանքից հետո այսօր առավոտյան ազատ արձակվեց Ռուսաստանցի ընդդիմադիր առաջնորդ Ալեքսեյ Նավալնին:
Նախագահ Պուտինի մոլի քննադատը հերթական անգամ ճաղերի ետևում էր հայտնվել չարտոնված ցույցեր կազմակերպելու համար:
Հուլիսի 24-ին, երբ նա դուրս էր եկել առավոտյան վազքի, իրավապահները նրան սեփական տան շքամուտքից բերման էին ենթարկել հենց մարզական շորերով: Օրեր անց Նավալնին բանտից հիվանդանոց էր տեղափոխվել, ըստ բժիշկների՝ եղնջացանով: Ընդդիմադիրը, մինչդեռ, չէր բացառել, որ մեկուսարանում կարող էր քիմիական նյութի ազդեցության ենթարկված լինել:
Այսօր, բանտից դւորս գալուն պես, հեռվում նկատելով խմբով կանգնած ոստիկանների, Նավալնին կատակել է՝ հետաքրքիր է՝ էլի՞ իմ հետևից են եկել:
«Նախ և առաջ ուզում եմ շնորհակալությունս հայտնել բոլոր այն հրաշալի և համարձակ մարդկանց, որոնք ողջ այս ընթացքում շարունակել են մասնակցել բողոքի ակցիաներին: Ուզում եմ իմ աջակցությունը հայտնել բոլոր նրանց, ովքեր այժմ կալանքի տակ են կամ անցնում են քրեական գործերով: Հիացած եմ Մոսկվայի քաղաքային դումայի ընտրությունների թեկնածուների համարձակությամբ, որոնք շարունակաբար ձերբակալվում են, բայց համառորեն չեն փոխում իրենց դիրքորոշումը: Ի դեմս նրանց՝ մենք տեսնում ենք նոր, իրական ընդդիմություն, և ես շատ ուրախ եմ այդ փաստի առթիվ», - ասել է Նավալնին:
Մոսկվայում բողոքի ցույցերը սկսվել են հուլիսի կեսերից, երբ ընտրական մարմինները հրաժարվեցին գրանցել ավելի քան հինգ տասնյակ ընդդիմադիր գործիչների թեկնածությունը քաղաքային դումայի՝ սեպտեմբերի 8-ին կայանալիք ընտրություններում: Պաշտոնական պատճառաբանությամբ՝ գրանցման համար անհրաժեշտ ստորագրություններն են կեղծված, ընդ որում՝ անխտիր բոլոր թեկնածուների դեպքում: Ընդդիմությունը, մինչդեռ, հայտարարում է քաղաքական պատվերի ու կոշտ ճնշումների մասին:
«Իշխանությունը ստով ու կեղծիքով չի բավարարվում այլևս: Պետք է անպայման տասնյակ մարդկանց ձերբակալեն, հարյուրավորներին ծեծի ենթարկեն, հարձակվեն հասարակական կազմակերպությունների վրա: Սա վկայում է, որ իշխանությունը ոչ մի աջակցություն չունի ժողովրդի շրջանում: Եվ նրանք դա զգում են ու վախից են նման քայլերի դիմում», - հայտարարել է ընդդիմադիր առաջնորդը:
Հուլիսի 27-ին և օգոստոսի 3-ին կայացած ակցիաների ժամանակ ցուցարարներին բռնի ուժով ցրելու և ծեծելու գործին էին լծվել ոչ միայն ոստիկանները, այլև հատուկջոկատայիններն ու Ռոսգվարդիայի աշխատակիցները: Կրեմլի կողմից վերահսկվող լրատվամիջոցներն այդ ակցիաները կա՛...