Սպիտակ տան ամենաազդեցիկ պաշտոնյաներից մեկը` Ազգային անվտանգության գծով խորհրդական Ջոն Բոլթոնը համալրում է Թրամփի վարչակազմը անսպասելիորեն լքած գործիչների պատկառելի ցանկը:
Բոլթոնի հրաժարականի մասին հայտնի դարձավ երեքշաբթի երեկոյան: Իր առանցքային խորհրդականներից մեկի պաշտոնանկության մասին Միացյալ Նահանգների նախագահ Դոնալդ Թրամփը հայտնեց Twitter-ում՝ որոշելով չխախտել ձևավորված ավանդույթը:
«Երեկ երեկոյան ես տեղեկացրեցի Ջոն Բոլթոնին, որ Սպիտակ տունը իր կարիքն այլևս չունի: Ինչպես և իմ վարչակազմի բազմաթիվ ներկայացուցիչներ, ես ևս կտրականապես համաձայն չէի նրա շատ առաջարկներին: Այս իսկ պատճառով ես խնդրեցի նրան հրաժարական ներկայացնել, ինչն էլ նա արել է այսօր առավոտյան», - գրել է Թրամփը:
Ուշագրավ է, որ հրաժարականին նախորդած իրադարձությունների` Բոլթոնի ներկայացրած տարբերակը տրամագծորեն տարբերվում է Թրամփի վարկածից:
Twitter-ի իր էջում Ջոն Բոլթոնը գրել է․ - «Երեկ երեկոյան ես հրաժարականի առաջարկով հանդես եկա: Նախագահ Թրամփը դրան ի պատասխան ասաց` արի դրա մասին խոսենք վաղը»:
Եվ քանի դեռ Վաշինգտոնում փորձում են հասկանալ, թե Սպիտակ տան ներկայացուցիչներից որ մեկի վարկածն է ավելի մոտ իրականությանը, ամերիկյան լրատվամիջոցները արձանագրում են, որ Բոլթոնի հրաժարականի արդյունքում առավել շահած գերատեսչությունը Պետդեպարտամենտն է: Վերջին ամիսներին Վաշինգտոնում համառ լուրեր էին շրջանառվում պետքատուղար Մայք Փոմփեոյի և Ջոն Բոլթոնի սուր հակասությունների մասին:
«Արդյո՞ք Բոլթոնի հրաժարականով ձեր գործը կթեթևանա»․ - երեկ երեկոյան պետքարտուղարին նման հարց ուղղեց Սպիտակ տանը հավատարմագրված լրագրողներից մեկը:
«Ես չեն անդրադառնում ներքին աշխատանքային խնդիրներին, թե ինչպես է ամեն ինչ կատարվում: Ես տեղյակ եմ, որ այս թեման ցավալիորեն երկար ժամանակ է քննարկվել: Կարող եմ միայն ասել, որ եղել են դեպքեր, երբ ես և դեսպան Բոլթոնը մեր հետագա գործողությունների վերաբերյալ տարակարծություններ ենք ունեցել», - հայտարարել է Փոմփեոն:
Ջոն Բոլթոնը երրորդ պաշտոնյան է, որ Թրամփի նախագահության ընթացքում զբաղեցրել է Ազգային անվտանգության գծով խորհրդականի պաշտոնը: Բոլթոնը Սպ...
