Չինաստանի առողջապահության պետական հանձնաժողովի փոխանցմամբ՝ վարակի էպիկենտրոն Հուբեյի գավառի սահմաններից դուրս կորոնավիրուսի առաջացրած COVID-19 կոդային անվամբ հայտնի թոքաբորբի նոր դեպքերի թիվը 13 օր շարունակ նվազում է:
Դա վկայում է կորոնավիրուսի տարածումը եթե ոչ կասեցնելու, ապա առնվազն փոքր-ինչ զսպելու մասին:
«Կիրակի օրվա ժամը 24։00-ի դրությամբ գավառում գրանցվել է ախտահարման 57934 հաստատված դեպք, 10844 հիվանդ բուժվել և դուրս է գրվել, մահացել է 1770 հիվանդ, ախտահարման դեպքերի ընդհանուր թիվը 70548 է: 7264 մարդու մոտ կա ախտահարման կասկած, 546016 մարդիկ շփումներ են ունեցել հիվանդների հետ և իշխանության տեսադաշտում են, 150539 մարդ հսկողության տակ է», - ասել է Չինաստանի առողջապահության պետական հանձնաժողովի խոսնակ Մի Ֆենգը:
Նշենք, որ այս զեկույցից հետո ստացվել է հաղորդագրություն, որի համաձայն՝ զոհերի թիվն արդեն հասել է 1775-ի: Կիրակի օրվա դրությամբ Հուբեյի գավառից դուրս գրանցվել է ախտահարման 115 նոր դեպք, 5 մարդ մահացել է. դա ողբերգական վիճակագրության որոշակի նվազում է:
Հանձնաժողովի փոխանցմամբ՝ Հուբեյի գավառում հաստատվել է ախտահարման 2048 նոր դեպք, մահացել է 105 մարդ: 1425 հիվանդ դուրս է գրվել, ծանր հիվանդների թիվը նվազել է 628-ով:
Առողջապահության համաշխարհային կազմակերպությունը նախազգուշացնում է, թե առայժմ հնարավոր չէ ինչ-ինչ կանխատեսումներ անել վարակի տարածման վերաբերյալ:
Կազմակերպության փորձագետների մի մեծ խումբ ժամանում է Պեկին, որտեղ չինացի պաշտոնյաների և բժիշկների հետ հանդիպումներում քննարկելու է կորոնավիրուսի խնդիրը: Օտարերկրացի մասնագետները կայցելեն վարակից առավել տուժած երեք չինական գավառներ:
...
